“Afg‘onistonga elektr energiyasi faqat ichki talab qondirilgandan keyin eksport qilinadi” — Energetika vaziri
Sherzod Xo‘jayev quyosh va shamol elektr stansiyalari yuqori quvvatda ishlagan paytda hosil bo‘ladigan ortiqcha elektr energiyasini eksport qilish orqali katta iqtisodiy samaraga erishish mumkinligini ta’kidladi.
O‘zbekistonda elektr energiyasini Afg‘onistonga eksport qilish mamlakat ichidagi talab to‘liq qondirilgandan keyin qoladigan ortiqcha quvvat hisobidan amalga oshiriladi. Bu haqda energetika vaziri Sherzod Xo‘jayev 13-avgust kuni Prezident Shavkat Mirziyoyevga energetika sohasi bo‘yicha taqdimotdan so‘ng ma’lum qildi.
Vazirning ta’kidlashicha, quyosh va shamol elektr stansiyalari yuqori quvvatda ishlaydigan davrlarda ortiqcha elektr energiyasi hosil bo‘lishi mumkin. Ana shu ortiqcha quvvatni eksport qilish orqali iqtisodiy samaradorlikni oshirish rejalashtirilmoqda.
“Afg‘onistonga eksport qilinadigan elektr energiyasi hajmi ichki talab to‘liq qondirilganidan keyin qoladigan qismi hisobidan ta’minlanadi”, — dedi Sherzod Xo‘jayev.
Shuningdek, vazir Surxondaryo viloyatidagi quyosh elektr stansiyalari faoliyatiga to‘xtaldi. Uning qayd etishicha, hududda hozir ishlab turgan quyosh elektr stansiyasi quvvati viloyatning mavjud talabini to‘liq qoplash imkonini beradi.
Shu bilan birga, Surxondaryoda yana 2–3 ta quyosh elektr stansiyasini qurish rejalashtirilgan. Yangi quvvatlarning ishga tushirilishi natijasida hududda ishlab chiqariladigan elektr energiyasi hajmi oshib, ichki ehtiyojdan ortgan qismini eksport qilish imkoniyati kengayadi.
