Germaniyada jazirama oqibatida 12,5 mingga yaqin kishi vafot etdi

 

Germaniyada 2026-yilda yuqori haroratning salomatlikka ta’siri oqibatida taxminan 12,5 ming kishi vafot etgani qayd etildi. Bu haqda Robert Kox instituti (RKI) hisobotiga tayanib, TASS xabar berdi.

 

RKI ma’lumotlariga ko‘ra, issiqlik bilan bog‘liq o‘limlarning eng yuqori ko‘rsatkichi Saarland va Reynland-Pfalts federal yerlarida qayd etilgan. Ushbu hududlarda har 100 ming aholiga mos ravishda 43,4 va 38,7 ta o‘lim to‘g‘ri kelgan. Germaniya bo‘yicha o‘rtacha ko‘rsatkich esa 100 ming aholiga 15 ta o‘limni tashkil etgan.

 

Jazirama issiq, ayniqsa, keksalar uchun xavfli bo‘lgan. Hisob-kitoblarga ko‘ra, 85 yosh va undan kattalar orasida qariyb 6,3 ming kishi issiqlik oqibatida vafot etgan. Shuningdek, 75–84 yoshdagi 3,1 mingdan ortiq, 65–74 yoshdagi qariyb 1,9 ming kishining o‘limi yuqori harorat bilan bog‘langan.

 

RKI hisob-kitoblariga ko‘ra, 22–28 iyun kunlari Germaniyada jazirama issiq sababli taxminan 9,6 ming kishi vafot etgan. O‘sha davrda mamlakatning ayrim hududlarida havo harorati 40 darajaga yaqinlashgan.

 

Taqqoslash uchun, RKI ma’lumotlarida 2018-yilda issiq bilan bog‘liq 9,4 ming, 2019-yilda esa 7,7 ming o‘lim qayd etilgani ko‘rsatilgan. Shu bilan birga, 2026-yil bo‘yicha yakuniy ko‘rsatkichlar keyinchalik qayta hisoblanishi mumkin.

 

Institut o‘z hisob-kitoblarini Germaniya Federal statistika boshqarmasining o‘lim ma’lumotlari hamda Germaniya ob-havo xizmati ma’lumotlari asosida shakllantiradi.

 

Jazirama issiq ortidan Germaniyada sog‘liqni saqlash va parvarish muassasalarining yuqori haroratlarga tayyorgarligi masalasi ham muhokama qilinmoqda. Xususan, kasalxonalar, parvarish muassasalari va bolalar bog‘chalarini sovutish tizimlari bilan jihozlashga investitsiyalarni oshirish takliflari ilgari surilgan.