Millatlar raqsi — do‘stlik va hamjihatlik timsoli
Qashqadaryoda o‘tkazilayotgan “Yoshlar — kelajak bunyodkorlari” V xalqaro ekologiya qurultoyi doirasida yoshlar turli xalqlarning milliy raqslarini ijro etdi.
Qashqadaryo viloyatining Shahrisabz tumanidagi “Lochin” bolalar oromgohida o‘tkazilayotgan “Yoshlar — kelajak bunyodkorlari” V xalqaro ekologiya qurultoyi doirasida ishtirokchilar uchun o‘ziga xos madaniy dastur tashkil etildi. Tadbirning eng yorqin va unutilmas lahzalaridan biri — “Xalqlar do‘stligi” dasturi bo‘ldi.
Mazkur dasturda ishtirokchilar o‘z milliy madaniyatini emas, balki boshqa xalqlarning milliy raqslari, musiqasi va an’analarini ijro etish orqali o‘ziga xos madaniy almashinuvni namoyish etdi. Bu esa tadbirga yanada o‘zgacha ruh va mazmun bag‘ishladi.
Xususan, Toshkent viloyati jamoasi Hindiston milliy raqsini ijro etib, hind xalqining o‘ziga xos raqs harakatlari, musiqasi va milliy liboslarini sahnada namoyon etdi. Xorijiy ishtirokchilar ham ushbu tashabbusni katta qiziqish bilan kutib oldi.
Belarus Respublikasidan tashrif buyurgan yoshlar esa Turkmaniston milliy madaniyatini aks ettiruvchi kuy-qo‘shiqlar ostida milliy liboslarda raqs ijro etib, ikki xalq madaniyatiga bo‘lgan hurmatini namoyish etdi.
Shuningdek, boshqa jamoalar tomonidan ham turli mamlakatlarning milliy raqslari ijro etilib, dunyoning turli xalqlariga xos san’at, urf-odat, musiqa va liboslar bir sahnada mujassamlashtirildi.
Ahamiyatlisi, mazkur tadbir oddiy raqs namoyishi bo‘lib qolmay, turli millat va elatlarni birlashtiruvchi madaniy ko‘prik vazifasini bajardi. Bir davlat vakillarining boshqa xalq madaniyatini o‘rganib, uni sahnada ijro etishi o‘zaro hurmat, bag‘rikenglik va do‘stlikning yorqin ifodasiga aylandi.
Tadbir davomida ishtirokchilar nafaqat raqs ijro etdi, balki boshqa xalqlarning madaniyati, an’analari va san’atiga bo‘lgan qiziqishini ham namoyish qildi. Turli tillarda yangragan musiqa, rang-barang milliy liboslar va jo‘shqin raqslar oromgoh hududida haqiqiy xalqaro do‘stlik muhitini yaratdi.
“Xalqlar do‘stligi” dasturi yoshlar o‘rtasidagi xalqaro aloqalarni yanada mustahkamlash, turli xalqlar madaniyatiga hurmat ruhini oshirish hamda yosh avlod qalbida bag‘rikenglik va hamjihatlik qadriyatlarini shakllantirishga xizmat qildi.
Shu tariqa, “Yoshlar — kelajak bunyodkorlari” V xalqaro ekologiya qurultoyi nafaqat ekologik bilim va tashabbuslar, balki xalqaro do‘stlik, madaniy almashinuv va o‘zaro hurmat bayramiga ham aylanmoqda.
