Namanganda IIO xodimiga 3 ming dollar pora berayotgan fuqaro ushlandi
Fuqaro o‘ziga nisbatan to‘plangan hujjatlarni tergovga yubormaslik va bloklangan mablag‘larni chiqarib berish evaziga xodimga pora taklif qilgan.
Namangan viloyatida o‘ziga nisbatan to‘plangan hujjatlarni tergov organlariga yubormaslik va bank tomonidan bloklangan mablag‘larni chiqarib berish evaziga ichki ishlar xodimiga 3 ming AQSH dollari miqdorida pora taklif qilgan fuqaro ushlandi. Bu haqda Ichki ishlar vazirligi xabar berdi.
Ma’lum qilinishicha, Davlatobod tumanida yashovchi fuqaroning arizasi yuzasidan tergovga qadar tekshiruv o‘tkazilgan. O‘rganishlar davomida bank plastik kartasi 2002-yilda tug‘ilgan fuqaroga tegishli ekani hamda undagi mablag‘lar boshqa tadbirkorning bank kartasiga o‘tkazilgani aniqlangan.
Shuningdek, MChJ rahbariga tegishli iPhone 15 Pro Max va Galaxy A34 5G rusumli telefonlar ko‘zdan kechirilgan. Qurilmalardagi Mobcash ilovasida boshqa shaxs profilining limit hisobida 40 million 615 ming so‘m, tranzaksiyalar tarixida esa 4 milliard 991 million so‘m mablag‘ aks etgani aniqlangan.
Mazkur holatlar yuzasidan tegishli hujjatlar rasmiylashtirilganidan so‘ng, fuqaro o‘ziga nisbatan to‘plangan materiallarni tergov organlariga yubormaslik, qonuniy chora ko‘rmaslik hamda bank tomonidan bloklangan mablag‘larni chiqarib berish evaziga IIO xodimiga 3 ming dollar berishni taklif qilgan.
Biroq ichki ishlar xodimi porani olishdan bosh tortgan. IIV Shaxsiy xavfsizlik bosh boshqarmasi xodimlari tomonidan o‘tkazilgan tezkor tadbir davomida fuqaro Namangan shahridagi Namangoniy ko‘chasida mayor Sultonovga 3 ming AQSH dollarini pora tariqasida berayotgan vaqtida ashyoviy dalillar bilan ushlangan.
Holat yuzasidan 1991-yilda tug‘ilgan shaxsga nisbatan Jinoyat kodeksining 211-moddasi 1-qismi bilan jinoyat ishi qo‘zg‘atilgan.
Hozirda tergov harakatlari olib borilmoqda.
