O‘zbekiston terma jamoasi IOI 2026da tarixiy natijaga erishdi
Yosh dasturchilar xalqaro informatika olimpiadasida 4 ta medalni qo‘lga kiritdi.
Toshkent shahrida O‘zbekiston mezbonligida o‘tkazilayotgan 38-Xalqaro informatika olimpiadasida (IOI 2026) mamlakatimiz terma jamoasi tarixidagi eng yuqori natijani qayd etdi.
90 dan ortiq mamlakatdan iqtidorli yosh dasturchilar ishtirok etayotgan nufuzli musobaqada O‘zbekiston vakillari 1 ta kumush va 3 ta bronza medalni qo‘lga kiritdi.
Jumladan:
-
Jaxonali Xaydaraliyev — Muhammad al-Xorazmiy nomidagi ixtisoslashtirilgan maktab o‘quvchisi — kumush medal;
-
Jahongirshoh Avazxonov — Namangan shahridagi Prezident maktabi o‘quvchisi — bronza medal;
-
Timur Kadirbergenov — Nukus shahridagi Prezident maktabi o‘quvchisi — bronza medal;
-
Ulug‘bek Rahmatullayev — Namangan shahridagi Prezident maktabi o‘quvchisi — bronza medal.
Shuningdek, Sardorbek Salimov — Navoiy shahridagi Prezident maktabi o‘quvchisi — “Honorable Mention” e’tirofi bilan taqdirlandi.
Ta’kidlanishicha, O‘zbekiston terma jamoasi 2025-yilgi IOIda 1 ta kumush va 1 ta bronza medalni qo‘lga kiritgan edi. Bu yilgi natija esa mamlakatimizning Xalqaro informatika olimpiadasidagi ishtiroki tarixidagi eng yuqori ko‘rsatkich bo‘ldi.
