O‘zbekistonda litsenziya olmasdan 3 oy tadbirkorlik qilish mumkin bo‘ladi
Bu muddatda ular litsenziya talablarini bajarishi va tegishli hujjatni olishi yoki faoliyatini to‘xtatishi kerak.
Tadbirkorlik faoliyatini litsenziya yoki ruxsat berish xususiyatiga ega hujjat olmasdan vaqtincha amalga oshirish imkonini beruvchi “Biznesga litsenziyasiz kirish” maxsus rejimi joriy etilmoqda. Bu haqda Adliya vazirligi xabar berdi.
Mazkur rejim doirasida talabgor o‘z faoliyatini boshlashdan oldin maxsus elektron tizim yoki Yagona interaktiv davlat xizmatlari portali (YIDXP) orqali vakolatli organni bepul xabardor qilishi mumkin.
Bunda litsenziya yoki tegishli ruxsat beruvchi hujjatni olmasdan faoliyat yuritishga 3 oy muddatga imkon beriladi. Ushbu davr mobaynida talabgor belgilangan faoliyatni litsenziyasiz yoki ruxsat beruvchi hujjatsiz amalga oshirganligi uchun javobgarlikka tortilmaydi.
Maxsus rejimdan foydalangan talabgor 3 oy davomida:
-
faoliyatini litsenziya yoki ruxsat berish talablari va shartlariga muvofiqlashtiradi;
-
belgilangan tartibda tegishli litsenziya yoki ruxsat beruvchi hujjatni oladi yoki mazkur faoliyatni amalga oshirishni to‘xtatadi.
Shuningdek, qonun bilan maxfiy hujjatlarni 30 yil davomida saqlash muddati belgilandi.
Shaxsiy tarkib bo‘yicha hujjatlarni saqlash muddatlari ham aniqlashtirildi. Unga ko‘ra, 2019-yil 1-yanvargacha ish yuritilishi yakunlangan shaxsiy tarkib hujjatlari idoraviy arxivlarda 75 yil, 2019-yil 1-yanvardan keyin shakllantirilgan hujjatlar esa 50 yil davomida saqlanadi.
