O‘zbekistonga pul o‘tkazmalari 6 oyda 9,3 milliard dollarga yetdi
2026-yilning birinchi yarmida xorijdan O‘zbekistonga yuborilgan mablag‘lar hajmi o‘tgan yilning shu davriga nisbatan 13 foizga oshdi.
Markaziy bankning “Jismoniy shaxslarning valyuta operatsiyalari” bo‘yicha 2026-yil I yarim yillik tahliliy sharhiga ko‘ra, yanvar–iyun oylarida O‘zbekistonga kelib tushgan pul o‘tkazmalari 9,3 milliard dollarni tashkil etdi.
Hisobot davrida P2P o‘tkazmalar hajmi ham sezilarli oshib, 4,8 milliard dollarga yetgan. Bu ko‘rsatkich o‘tgan yilning mos davriga nisbatan 32 foizga ko‘p.
Markaziy bank pul o‘tkazmalari o‘sishiga mehnat muhojirlari faoliyat yuritayotgan mamlakatlarda ishchi kuchiga talab va ish haqining yuqori darajada saqlanib qolgani, shuningdek, milliy valyutalarning umumiy mustahkamlangani ta’sir ko‘rsatganini qayd etdi.
Shu davrda O‘zbekistondan xorijga yuborilgan pul o‘tkazmalari 1,3 milliard dollarni tashkil etib, yillik hisobda 8 foizga oshgan.
Valyuta ayirboshlash operatsiyalarida ham o‘sish kuzatildi. 2026-yilning yanvar–iyun oylarida jismoniy shaxslar bilan bog‘liq valyuta ayirboshlash operatsiyalarining umumiy aylanmasi 19,1 milliard dollar bo‘lib, bir yil avvalgi ko‘rsatkichdan 31 foizga yuqori bo‘lgan.
Banklar hisobot davrida aholidan 12,3 milliard dollarlik xorijiy valyutani sotib olgan va 6,8 milliard dollarlik valyutani sotgan. Natijada jismoniy shaxslar tomonidan taklif qilingan valyutaning sof hajmi 5,5 milliard dollarni tashkil etgan.
Markaziy bank ma’lumotlariga ko‘ra, jismoniy shaxslar segmentidagi sof valyuta taklifining umumiy bozordagi ulushi 26 foizdan 29 foizgacha oshgan. Shuningdek, masofaviy xizmatlar va kecha-kunduz ishlaydigan valyuta ayirboshlash bankomatlari orqali amalga oshirilayotgan operatsiyalar hajmining ortishi qayd etilgan.
