“Qamchini prezident qilmoqchi edim” — Sadir Japarov
Qirg‘iziston prezidenti do'sti Qamchibek Tashiyev haqida gapirib berdi.
Qirg‘iziston prezidenti Sadir Japarov Qamchibek Tashiyevning 2027-yilgi prezidentlik saylovlarida nomzodini ilgari surishini istagani haqida ma’lum qildi. Bu haqda u jurnalist Ali Toktakunovga bergan intervyusida aytgan.
Japarovning so‘zlariga ko‘ra, u Tashiyev bilan 2005-yildan beri tanish va 2020-yilda hokimiyatga kelganidan so‘ng uni Davlat milliy xavfsizlik qo‘mitasi raisi etib tayinlagan. Prezident Tashiyev ushbu lavozimda besh yil davomida yaxshi faoliyat yuritganini qayd etgan.
Japarov Tashiyevning asosiy kamchiliklaridan biri sifatida uning yaqinlari, jumladan, qarindoshlari va tanishlari faoliyatini yetarlicha nazorat qilmaganini ko‘rsatgan.
“Biz do‘st bo‘lib qolamiz, lekin uni davlat xizmatiga qaytarish rejam yo‘q. Hozir u dam olishi kerak”, — degan Japarov.
Prezidentning ta’kidlashicha, Tashiyev lavozimidan chetlatilganidan keyin o‘z xatolarini tan olgan va yaqinlariga yetarlicha nazorat o‘rnatmaganini bildirgan.
Japarov, shuningdek, Tashiyevni 2027-yilgi prezidentlik saylovlarida qo‘llab-quvvatlash bo‘yicha o‘z rejasini ilgari surganini ma’lum qilgab. Unga ko‘ra, Japarov olti yil prezidentlik qilganidan so‘ng, 2027-yilda qayta nomzodini qo‘ymaslik va Tashiyevni prezidentlikka nomzod sifatida ilgari surishni rejalashtirgan.
“Rostini aytsam, sizga butun haqiqatni aytaman. Mening o‘z rejam bor edi: olti yil ishlab, keyin 2027-yilda lavozimga nomzodimni qo‘ymaslik. Agar Qamchi o‘sha paytgacha tayyor bo‘lganida, tinimsiz mehnat qilganida va tajriba orttirganida, men uning nomzodini qo‘yishini xohlardim. Men nomzodimni qo‘ymasdim, Qamchini prezident qilib, nafaqaga chiqardim. Bu mening o‘z rejam edi”, — degan Japarov.
U Tashiyevga bu rejasini taxminan ikki yil avval aytganini ham bildirgan. Biroq keyinchalik Tashiyev prezidentlikka tayyor emasligini ko‘rganini ta’kidlagan.
Japarov Tashiyevning lavozimidan ozod etilishi parlament va jamiyatda tarafkashlik kuchayishi hamda mamlakat aholisini bo‘linish xavfi bilan bog‘liq bo‘lganini aytgan.
Shuningdek, prezident Tashiyevning kelgusida davlat xizmatiga qaytishi rejalashtirilmaganini bildirgan. Tashievga nisbatan sud jarayonlari bo‘yicha esa Japarov sud qaroriga aralashmasligini va apellyatsiya natijasini kutish kerakligini ta’kidlagan.
