Qirg‘izistonda davlat to‘ntarishiga urinish ishi bo‘yicha 70 kishi so'roq qilinadi
Apellyatsiya sud majlisi 17-avgust kuni bo'lib o'tadi.
Qirg‘izistonda muddatidan oldin prezidentlik saylovlarini o‘tkazishni talab qilgan 70 nafar siyosatchi va jamoat arbobi davlat to‘ntarishiga urinish ishi bo‘yicha apellyatsiya sudida guvoh sifatida so‘roq qilinadi. Bu haqda sobiq parlament spikeri Nurlanbek Turg‘unbek uuluni himoya qilayotgan advokat Latypbek Nuralimov ma’lum qildi.
2026-yil fevral oyida 75 nafar siyosiy va jamoat arbobi konstitutsiyadagi o‘zgarishlar sabab muddatidan oldin prezidentlik saylovlarini o‘tkazishni talab qilgan petitsiyani imzolagan. Keyinchalik ulardan sakkiz nafari, jumladan, petitsiyani imzolagan besh kishi davlat to‘ntarishiga urinishda ayblangan.
Himoya tomoni qolgan 70 nafar imzo chekuvchiga ham huquqiy baho berilmaganini ta’kidlab, ularni sudga chaqirishni so‘ragan. Sud mazkur iltimosnomani asosli deb topib, ularning keyingi majlisda ishtirokini ta’minlashga qaror qilgan.
2-iyul kuni Bishkekning Pervomayskiy tuman sudi Nurlanbek Turg‘unbek uulu, Qamchibek Tashiyev, sobiq bosh prokuror Qurmankul Zulushev va yana besh kishini hokimiyatni egallab olishga urinishda aybdor deb topib, ularga uch yillik sinov muddati bilan to‘rt yil qamoq jazosi tayinlagan edi. Tomonlar sud qarori ustidan apellyatsiya shikoyatlarini bergan.
