Samarqand hududiy elektr tarmoqlarini turkiyalik investorlar boshqaradi
O‘zbekistonda ilk bor taqsimlash elektr tarmoqlarini investitsiya kiritish sharti bilan xususiy sektor boshqaruviga berish Samarqand viloyatida yo‘lga qo‘yiladi.
Samarqand viloyatidagi hududiy elektr tarmoqlarini boshqarish Turkiyaning Aksa Enerji kompaniyasiga beriladi. Bu haqda 13-avgust kuni Prezidentga yoqilg‘i-energetika resurslaridan samarali foydalanish masalalari yuzasidan taqdim etilgan axborotda ma’lum qilindi.
Energetika vaziri Sherzod Xo‘jayevning ta’kidlashicha, O‘zbekistonda ilk bor taqsimlash elektr tarmoqlarini investitsiya kiritish sharti bilan xususiy sektor boshqaruviga berish bo‘yicha xalqaro tender o‘tkazilgan. Unda Turkiyaning Aksa Enerji kompaniyasi g‘olib deb topilgan.
Loyiha doirasida kompaniya Samarqand viloyatidagi mavjud elektr tarmoqlarini ekspluatatsiya qilish bilan birga, yangi tarmoqlarni qurish, mavjud infratuzilmani rekonstruksiya va modernizatsiya qilish ishlarini amalga oshiradi.
Shuningdek, Samarqand hududiy elektr tarmoqlarida faoliyat yuritayotgan barcha ishchi-xodimlar kompaniya tizimida ish bilan ta’minlanishi ko‘zda tutilgan. Vazir ma’lumotiga ko‘ra, xorijdan atigi 10–15 nafar mutaxassis jalb qilinadi, qolgan ishlar mahalliy mutaxassislar tomonidan bajariladi.
Loyihada mahalliy ishlab chiqaruvchilarni qo‘llab-quvvatlashga ham alohida e’tibor qaratiladi. Xususan, Turkiya kompaniyasi O‘zbekistondagi faoliyati davomida tarmoqlarni qurish, rekonstruksiya va modernizatsiya qilish uchun zarur mahsulotlarning kamida 90 foizini ichki bozordan xarid qilishi ko‘zda tutilgan.
Prezident Samarqanddagi ushbu tajribadan kelib chiqib, kelgusida elektr taqsimlash tarmoqlarini boshqarishda shunday yondashuvni boshqa hududlarda ham joriy etish bo‘yicha topshiriq bergan.
