Shavkat Mirziyoyev “O‘zbekiston Prezidenti administratsiyasi to‘g‘risida”gi Konstitutsiyaviy qonunni imzoladi

 

Prezident Shavkat Mirziyoyev tomonidan “O‘zbekiston Respublikasi Prezidenti Administratsiyasi to‘g‘risida”gi Konstitutsiyaviy qonun imzolandi.

 

Yangi qonun bilan Prezident Administratsiyasining huquqiy maqomi, vakolatlari, vazifalari hamda davlat organlari bilan munosabatlari qonun darajasida tartibga solindi.

 

Qonunga ko‘ra, Prezident Administratsiyasi davlat organi sifatida Prezidentning konstitutsiyaviy vakolatlarini tashkiliy, huquqiy va tahliliy jihatdan ta’minlaydi. Administratsiyani Prezident shakllantiradi, u Prezident belgilagan ustuvor yo‘nalishlarda faoliyat yuritadi hamda Prezidentga bo‘ysunadi va hisobdor hisoblanadi.

 

Hujjat 4 bob va 34 moddadan iborat bo‘lib, unda Administratsiyaning asosiy vazifalari belgilangan. Jumladan, Prezidentning farmon, qaror va farmoyishlari loyihalarini tayyorlash, ularning ijrosini tashkil etish va nazorat qilish, mamlakatning ijtimoiy-iqtisodiy hamda ijtimoiy-siyosiy rivojlanishiga oid yangi tashabbuslarni ishlab chiqish nazarda tutilgan.

 

Shuningdek, Administratsiya aholi va tadbirkorlar bilan ochiq va to‘g‘ridan to‘g‘ri muloqotlarni tashkil etish, ularning muammolariga yechimlar ishlab chiqish, qonunlarni Prezident imzosiga yoki qaytarishga tayyorlash, Prezidentning Oliy Majlisga Murojaatnomasini tashkil etish kabi vazifalarni ham amalga oshiradi.

 

Qonun bilan Prezident Administratsiyasi rahbarining huquqiy maqomi va vazifalari, mansabdor hamda boshqaruv xodimlarini lavozimga tayinlash va ozod etish tartiblariga oid normalar ham belgilandi. Shuningdek, Prezident huzuridagi Xavfsizlik kengashi faoliyatini tashkil etishning huquqiy asoslari yaratildi.

 

Administratsiya Prezident faoliyatini tashkil etish doirasida parlament, Hukumat, vazirlik va idoralar, mahalliy hokimliklar, sud hokimiyati hamda sudyalar hamjamiyati organlari bilan hamkorlik qiladi.

 

Bundan tashqari, Administratsiya Prezidentga bevosita bo‘ysunuvchi davlat organlari faoliyatini muvofiqlashtiradi, ularni takomillashtirish bo‘yicha takliflar ishlab chiqadi va Prezidentga kiritadi.

 

Konstitutsiyaviy qonunning qabul qilinishi Prezidentlik institutining huquqiy asoslarini mustahkamlash, davlat boshqaruvi tizimining samaradorligi va hisobdorligini oshirishga xizmat qiladi.