Suriyadagi jangarilarga qo‘shilmoqchi shaxs 10 yilga qamaldi
Janubiy Koreyada o‘qish davrida terroristik tashkilotlar ta’siriga tushgan fuqaro internet orqali ularning materiallarini tarqatgan, pul mablag‘lari yuborgan va keyinchalik jangarilar safiga qo‘shilishga uringan.
Ijtimoiy tarmoqlar orqali terroristik tashkilotlar targ‘ibotiga tushib qolgan O‘zbekiston fuqarosi sud hukmi bilan 10 yil muddatga ozodlikdan mahrum etildi. Bu haqda DXX xabar berdi.
Ma’lum bo‘lishicha, 1995-yilda Qashqadaryo viloyatida tug‘ilgan fuqaro 2017-yilda Janubiy Koreyadagi nufuzli universitetlardan biriga o‘qishga kirgan. Xorijda tahsil olish davrida u ijtimoiy tarmoqlar orqali “jihod”, “hijrat” va “shahidlik” kabi tushunchalarni targ‘ib qiluvchi shaxslarning audio va videoma’ruzalari bilan tanishgan.
Shuningdek, Suriyadagi qurolli to‘qnashuvlar aks etgan videomateriallarni muntazam ko‘rishi natijasida uning ongiga aqidaparastlik g‘oyalari singdirilgan.
Shundan so‘ng fuqaro Instagram va Telegram ijtimoiy tarmoqlari orqali Suriya hududida faoliyat yuritgan “Tavhid va jihod katibasi” hamda “G‘uroba katibasi” kabi terroristik tashkilotlarga aloqador shaxslar bilan muloqot o‘rnatgan. Ularning g‘oyalarini aks ettiruvchi materiallarni tarqatishda ishtirok etgan.
Universitetni tamomlaganidan keyin ham Janubiy Koreyada qolgan fuqaro “G‘uroba katibasi” terroristik tashkilotining media blogeri sifatida faoliyat yuritgan “Saad Muxtor”ning internet orqali amalga oshirgan targ‘ibot va aldovlariga ishongan. Natijada unga pul mablag‘larini yuborgan.
2023-yil dekabr oyida fuqaro O‘zbekistonga qaytib kelgan. Biroq shundan keyin ham terroristik tashkilotlar bilan bog‘liq rejalaridan voz kechmagan.
2024-yil iyul oyida u Suriyadagi jangarilar safiga qo‘shilish maqsadida Turkiyaga borgan. Biroq uning ushbu rejasi amalga oshmagan va u ortga qaytgan.
Huquqni muhofaza qiluvchi organlar tomonidan o‘tkazilgan tezkor tadbirlar davomida fuqaroning mazkur faoliyati aniqlanib, u qo‘lga olingan. Unga nisbatan jinoyat ishi qo‘zg‘atilib, tergov harakatlari olib borilgan.
Sud hukmiga ko‘ra, u Jinoyat kodeksining 244¹, 244², 155² va 155³-moddalarida nazarda tutilgan jinoyatlarni sodir etganlikda aybli deb topilgan.
Unga 10 yil muddatga ozodlikdan mahrum qilish jazosi tayinlangan.
