Boysundagi o‘rmon xo‘jaligida yong‘in yuz berdi
Yong‘in 24 soat ichida bartaraf etilgan.
2026-yil 12-avgust kuni soat 17:15 da “112” tizimi orqali Boysun tumani “Chilonzor” MFY hududidagi “Boysun davlat o‘rmon xo‘jaligi”ga qarashli “Xomkon” o‘rmon bo‘limida quruq o‘t va shox-shabbalar yongani haqida xabar kelib tushgan.
Xabar asosida hodisa joyiga Surxondaryo viloyati Favqulodda vaziyatlar boshqarmasi hamda “Boysun davlat o‘rmon xo‘jaligi”ning kuch va vositalari jalb etilgan.
Yong‘inni bartaraf etish ishlariga jami 309 kishi va 11 ta texnika jalb qilingan. Shundan Favqulodda vaziyatlar boshqarmasidan 194 nafar shaxsiy tarkib va 8 ta texnika, “Boysun davlat o‘rmon xo‘jaligi”dan 60 nafar xodim va 3 ta texnika, shuningdek, 55 nafar mahalliy ko‘ngilli fuqaro jalb etilgan.
13-avgust soat 17:30 holatiga ko‘ra, yong‘in to‘liq bartaraf etilgan.
Dastlabki ma’lumotlarga ko‘ra, yong‘in oqibatida taxminan 1 gektar maydondagi quruq o‘t va shox-shabbalar yongan.
Hodisa oqibatida fuqarolarning tan jarohati olgani haqida ma’lumot kelib tushmagan.
Ayni paytda yong‘inning kelib chiqish sabablari aniqlanmoqda.
