“Hormuz bo‘g‘ozi Eronniki bo‘lib qoladi” — Eron
Eron Donald Trampning Hormuz bo‘g‘ozini AQSH hududi deb e’lon qilish haqidagi bayonotiga javob berdi
Eron AQSH prezidenti Donald Trampning Hormuz bo‘g‘ozini kelgusida “AQSH hududi” deb e’lon qilish haqidagi bayonotiga keskin munosabat bildirdi. Bu haqda Euronews xabar berdi.
Tramp 15-avgust kuni Nyu-Yorkda so‘zlagan nutqida AQSH Eron ustidan “g‘alabani yakunlagach”, Hormuz bo‘g‘ozini AQSH hududi deb e’lon qilishini aytgan. U, shuningdek, AQSH kuchlari bo‘g‘ozda blokada o‘rnatganini va Vashington xohlamasa, u yerdan hech bir kema o‘ta olmasligini ta’kidlagan.
Tehron esa bu bayonotni rad etdi. Eron tashqi ishlar vazirining huquqiy va xalqaro masalalar bo‘yicha o‘rinbosari Kozem G‘aribobodiy Hormuz bo‘g‘ozi Eron bo‘g‘ozi bo‘lganini, hozir ham shunday ekanini va kelgusida ham shunday bo‘lib qolishini bildirgan.
Uning ta’kidlashicha, Eron AQSHning tahdidlariga va kuch namoyishiga yon bermaydi. G‘aribobodiy, shuningdek, Vashington Eronning mag‘lubiyati haqidagi qarashlaridan voz kechishi kerakligini ta’kidlagan.
Hormuz bo‘g‘ozi Fors ko‘rfazini Ummon ko‘rfazi va Arab dengizi bilan bog‘laydigan strategik suv yo‘li hisoblanadi. Mazkur yo‘nalish orqali jahon dengiz neft tashuvlarining qariyb chorak qismi o‘tadi. Shu sababli bo‘g‘oz ustidan nazorat masalasi xalqaro energetika bozori uchun ham muhim ahamiyatga ega.
