Ispaniyada quyosh tutilishini kuzatgan 500 dan ortiq kishi shifokorga murojaat qildi
Fuqarolar bosh aylanishi, holsizlik, yengil jarohatlar va ko‘zlardagi noqulayliklardan shikoyat qilgan.
Ispaniyada 12-avgust kuni kuzatilgan quyosh tutilishidan so‘ng 511 kishi tibbiy yordamga murojaat qilgan. Bu haqda El Mundo nashri ma’lum qildi.
Ma’lumotlarga ko‘ra, fuqarolarning aksariyati bosh aylanishi, holsizlik, xavotir, yengil jarohatlar va ko‘zlardagi noqulayliklar yuzasidan murojaat qilgan. Aksariyat holatlarda bemorlarni shifoxonaga yotqizish talab etilmagan.
Hududlar kesimida eng ko‘p murojaatlar Kataloniyada — 115 ta, Madridda — 101 ta, Basklar mamlakatida — 58 ta, Andalusiyada — 44 ta, Mursiyada — 32 ta va Aragonda — 30 ta qayd etilgan. Umuman, 17 ta avtonom hamjamiyatda tibbiy murojaatlar kuzatilgan.
Shifokorlar quyosh tutilishini maxsus himoya vositalarisiz kuzatish ko‘z salomatligi uchun xavfli bo‘lishi mumkinligi haqida ogohlantirmoqda. Mutaxassislarning qayd etishicha, ko‘z shikastlanishining ayrim belgilari darhol emas, balki bir necha soat yoki hatto kun o‘tib namoyon bo‘lishi mumkin.
Tutilish arafasida maxsus himoya ko‘zoynaklariga talab sezilarli darajada oshgan. Ayrim fuqarolar esa hodisani kuzatish uchun uy sharoitida tayyorlangan qurilmalar, payvandlash niqoblari va boshqa vositalardan foydalangan.
