O‘zbek boksining afsonasi Rufat Risqiyev vafot etdi
U o‘zbek boksida jahon chempionligi va Olimpiya medali sohibi bo‘lgan ilk bokschi sifatida tarixda qolgan.
O‘zbekiston sporti og‘ir judolikka uchradi. Afsonaviy bokschi, 1974-yilgi jahon chempioni va 1976-yilgi Olimpiya o‘yinlarining kumush medali sovrindori Rufat Risqiyev 76 yoshida vafot etdi.
Bu haqda Milliy Olimpiya qo‘mitasi matbuot kotibi Zafar Imomxo‘jayev ma’lum qildi.
Rufat Risqiyev o‘zbek boksining rivojiga katta hissa qo‘shgan sportchilardan biri bo‘lib, faoliyati davomida “Toshkent yo‘lbarsi” nomi bilan shuhrat qozongan. U Olimpiya o‘yinlari va jahon chempionatlarida sovrindor bo‘lgan ilk o‘zbek bokschisi sifatida tarixda qolgan.
U 1974-yilda jahon chempioni bo‘lgan, 1976-yilgi Monreal Olimpiya o‘yinlarida esa kumush medalni qo‘lga kiritgan. Shuningdek, AQSH, Kuba, Avstriya, sobiq Yugoslaviya va Ispaniyada o‘tkazilgan qator nufuzli xalqaro turnirlarda g‘oliblikni qo‘lga kiritgan.
Sportchilik faoliyatidan so‘ng ham Rufat Risqiyev o‘zbek boksiga xizmat qilishda davom etdi. U Markaziy Osiyodagi ilk xalqaro toifadagi professional boks hakami sifatida ham faoliyat yuritgan.
Rufat Risqiyev mamlakat sporti oldidagi xizmatlari uchun “Hurmat Belgisi”, “Buyuk xizmatlari uchun” va “El-yurt hurmati” ordenlari bilan taqdirlangan.
2016-yilda sog‘lig‘i bilan bog‘liq jiddiy muammolar sababli Toshkent shahridagi 16-shifoxonada unga jarrohlik amaliyoti o‘tkazilgan edi.
