O‘zbekiston va Turkmaniston to‘g‘ridan-to‘g‘ri aviaqatnovlarni tiklashi mumkin

 

13-avgust kuni O‘zbekiston va Turkmaniston vakillari o‘rtasida ikki davlatning transport-logistika sohasidagi hamkorligini rivojlantirish masalalariga bag‘ishlangan uchrashuv bo‘lib o‘tdi.

 

Uchrashuvda O‘zbekiston transport-logistika sohasi vakillari hamda Turkmanistonning O‘zbekistondagi Favqulodda va Muxtor Elchisi Shadurdi Meredov ishtirok etdi.

 

Muzokaralar davomida, xususan, haydovchilar uchun vizalarni elektron shaklda rasmiylashtirish, to‘lovlarni optimallashtirish, Farap–Olot chegara o‘tish punktidagi jarayonlarni takomillashtirish, shuningdek, navbatlar va kutish vaqtlarini qisqartirish masalalari muhokama qilindi.

 

Shuningdek, tez buziladigan mahsulotlarni tashish uchun alohida koridor tashkil etish, neytral hududda ikkinchi ko‘prik qurish hamda Turkmanboshi porti orqali avtomobil va temir yo‘l tashuvlarini jadallashtirish bo‘yicha takliflar bildirildi.

 

Tomonlar vazn-gabarit cheklovlarini qayta ko‘rib chiqish masalasini ham ko‘rib chiqdi. Muzokaralarda O‘zbekiston va Turkmaniston o‘rtasida to‘g‘ridan-to‘g‘ri aviaqatnovlarni qayta tiklash masalasiga ham alohida e’tibor qaratildi.

 

Turkman tomoni bildirilgan takliflarni ko‘rib chiqish va ularni tegishli davlat organlariga yetkazishga tayyorligini ma’lum qildi.

 

Uchrashuv yakunida ikki davlat o‘rtasidagi transport-logistika aloqalarini yanada rivojlantirish hamda tashuvchilar uchun qulay shart-sharoitlar yaratish bo‘yicha hamkorlikni davom ettirishga kelishib olindi.