Qoraqalpog‘istonda yana bir “qochoq ota” ushlandi

Qoraqalpog‘istonda aliment to‘lashdan bo‘yin tovlab, yashirinib yurgan ota zapravkada qo‘lga tushib, xodimlardan qochishga urindi. Bu haqida MIB axborot xizmati Zamon.uz'ga maʼlum qildi.

 

Qayd etilishia, MIB Amudaryo tuman bo‘limi ish yurituvida mavjud bo‘lgan, Fuqarolik ishlari bo‘yicha Amudaryo tuman sudning ijro hujjatiga asosan undiruvchi S.Sh. foydasiga tarbiyasidagi uch nafar farzandlarining taʼminoti uchun qarzdor M.X. dan aliment undirish belgilangan.

 

Qarzdor tomonidan aliment pullari har oy o‘z vaqtida to‘lab kelinmaganligi sababli, ijro hujjati ijrosini taʼminlash maqsadida, qarzdorning yashash manziliga bir necha marotaba borilganida, qarzdor ushbu manzilda yo‘qligi aniqlangan.

 

Shu sababli, unga nisbatan Byuroning Amudaryo tuman bo‘limi davlat ijrochisi tomonidan qidiruv eʼlon qilingan.

 

Majburiy ijro byurosi Qoraqalpog‘iston Respublikasi boshqarmasi qidiruv shuʼbasi va Ichki ishlar xodimlari birgalikda joriy yilning 13 avgust kuni o‘tkazilgan tadbirda, qarzdor Nukus shahridagi avtomobillarga yoqilg‘i qo‘yish shoxobchasida yurganligi aniqlangan.

 

Bundan tashqari, qarzdor xodimlarning qonuniy talablariga bo‘ysunmasdan, o‘zga shaxsga tegishli bo‘lgan avtomashinada voqea joyidan qochishga ulgurgan. Biroq, olib borilgan tezkor-qidiruv tadbirlari natijasida, qarzdor Amudaryo tumani hududida qo‘lga olingan.

 

Hozirda qarzdorning aliment to‘lovlaridan 85,4 mln so‘m qarzi mavjud bo‘lib, uning javobgarlik masalasi ko‘rib chiqilmoqda.