Rossiya yozda Ukrainaning 19 ta aholi punktini egallaganini bildirdi
Mudofaa vazirligi Dnipropetrovsk va Zaporijjya viloyatlaridagi aholi punktlari egallanganini ma’lum qilgan.
Rossiya qo‘shinlari 2026-yil yozidagi harbiy kampaniya davomida Ukrainaning janubi-sharqidagi 19 ta aholi punktini nazoratiga olgan. Bu haqda Rossiya Mudofaa vazirligi 15-avgust kuni ma’lum qildi.
Vazirlik bayonotida aytilishicha, aholi punktlari Dnipropetrovsk va Zaporijjya viloyatlarida joylashgan. Biroq Rossiya tomoni egallangan aholi punktlarining nomlarini ochiqlamagan. Rossiya Mudofaa vazirligi bu ma’lumotni Sharqiy qo‘shinlar guruhi qo‘mondoni Pyotr Bolgarevning hisobotiga asoslagan.
Bundan tashqari, Rossiya kuchlari Zaporijjya viloyatidagi Ribalskoye aholi punktini yaqinda nazoratiga olgani haqida ham ma’lumot berildi. Bu xabarni Rossiyaning Interfaks agentligi tarqatgan.
Rossiya frontdagi ilgarilashlari haqida bayonot berayotgan bir paytda, Ukraina ham janubi-sharqiy frontda hududlarni qaytarib olayotganini bildirgan. Ukraina prezidenti Vladimir Zelenskiy 12-avgust kuni yil boshidan buyon mamlakat qurolli kuchlari 745 kvadrat kilometr hududni Rossiya nazoratidan qaytarganini ma’lum qilgan. Uning so‘zlariga ko‘ra, Dnipropetrovsk, Donetsk va Zaporijjya viloyatlari tutashgan hududdagi 26 ta aholi punkti Ukraina nazoratiga qaytarilgan.
Mustaqil ochiq manbalar asosida jang maydonidagi vaziyatni kuzatuvchi DeepState ham Ukraina kuchlari 19 ta aholi punkti ustidan nazoratni tiklagani va yana olti hududda Rossiya qo‘shinlarini ortga surganini bildirgan.
Ma’lumotlarga ko‘ra, Rossiya qo‘shinlarining frontdagi umumiy ilgarilashi 2026-yilda avvalgi davrlarga nisbatan sekinlashgan. Shu bilan birga, Moskva Ukraina poytaxti Kiyev va boshqa shaharlarga ballistik raketa zarbalarini ham kuchaytirgan.
