Shavkat Mirziyoyev Rufat Risqiyevning vafoti munosabati bilan hamdardlik bildirdi
“Toshkent yo‘lbarsi” nomi bilan tanilgan afsonaviy bokschi 76 yoshda vafot etdi.
O‘zbek boks maktabining atoqli namoyandasi, jahon chempioni, Olimpiya o‘yinlari sovrindori, mashhur sportchi va murabbiy Rufat Asadovich Risqiyev 15-avgust kuni 76 yoshida vafot etdi.
Prezident Shavkat Mirziyoyev Rufat Risqiyevning vafoti munosabati bilan marhumning oila a’zolari va yaqinlariga hamdardlik bildirdi.
Rufat Risqiyev 1949-yil 2-oktyabrda Toshkent viloyatida tug‘ilgan. U yoshligidan boks bilan shug‘ullanib, qisqa vaqt ichida yuksak mahorat va irodaga ega sportchi sifatida tanilgan.
U 1974-yilgi jahon chempioni, 1976-yilda Monreal shahrida o‘tkazilgan Olimpiya o‘yinlarining kumush medali sohibi, sobiq Ittifoqning to‘rt karra chempioni bo‘lgan. Sportdagi yorqin faoliyati tufayli u xalq orasida “Toshkent yo‘lbarsi” nomi bilan mashhur bo‘lgan.
Rufat Risqiyev Markaziy Osiyo mamlakatlarida birinchi xalqaro professional boks hakami sifatida ham faoliyat yuritgan. Keyingi yillarda murabbiy va hakam sifatida o‘zbek boks maktabining rivojiga katta hissa qo‘shgan.
Uning mamlakat sportini rivojlantirishdagi xizmatlari davlat tomonidan munosib taqdirlanib, “El-yurt hurmati” va “Do‘stlik” ordenlari bilan mukofotlangan.
Rufat Risqiyevning o‘zbek sporti, xususan, boks rivojiga qo‘shgan ulkan hissasi, yosh avlod tarbiyasidagi xizmatlari va yorqin xotirasi xalqimiz qalbida hamisha saqlanib qoladi.
