Toshkent hayvonot bog‘ida erkak sher va jayralarga tosh otdi
Holat yuzasidan videokuzatuv yozuvlari o‘rganilib, shaxsni aniqlash choralari ko‘rilmoqda.
13-avgust kuni Toshkent hayvonot bog‘ida tashrif buyuruvchilardan birining hayvonlarga nisbatan shafqatsiz munosabatda bo‘lgani qayd etildi.
Ma’lum qilinishicha, erkak tashrif buyuruvchi sher Aleks va jayralarga tosh ota boshlagan. Jayralar volyeri ochiq bo‘lgani sababli tashlangan toshlarning ayrimlari hayvonlarga tekkan.
Holatning yana bir achinarli jihati shundaki, erkakning harakatlarini uning farzandi ham takrorlab, hayvonlarga tosh ota boshlagan. Ayrim tashrif buyuruvchilar esa toshlar hayvonlarga tekkanidan so‘ng qarsak chalgan.
Ayni paytda jayralarning holati veterinariya mutaxassislari tomonidan tekshirilmoqda.
Hayvonot bog‘i ma’muriyati tomonidan hodisa yuzasidan videokuzatuv kameralaridagi yozuvlar o‘rganilmoqda. Hayvonlarga tosh otgan shaxsni aniqlash bo‘yicha tegishli choralar ko‘rilmoqda.
