Toshkentda fuqaro MIB orqali quruvchiga to‘lagan pulini qaytarib oldi
Natijada uyni o‘z vaqtida topshirmagan quruvchidan 323 mln so‘mdan ortiq mablag‘ fuqaro foydasiga undirildi.
Fuqarolik ishlari bo‘yicha Yakkasaroy tumanlararo sudining 2026 yil 10 iyundagi ijro varaqasiga asosan qarzdor quruvchi tashkilotdan undiruvchi fuqaro B.V. foydasiga jami 323 391 000 so‘m pul mablag‘ini undirish to‘g‘risidagi ijro hujjati Majburiy ijro byurosining Sergeli tuman bo‘limi ish yurituviga 2026 yil 11 iyun kuni kelib tushgan.
Mazkur mablag‘ fuqaro B.V. tomonidan qurilish tashkilotiga uy-joy sotib olish maqsadida boshlang‘ich to‘lov sifatida amalga oshirilgan bo‘lib, qurilish tashkiloti tomonidan uy belgilangan muddatda topshirilmaganligi sababli sud qaroriga asosan fuqaro foydasiga undirilishi belgilangan.
Davlat ijrochisi tomonidan qonunchilikda belgilangan tartibda ijro ishi qo‘zg‘atilib, qarzdorga ixtiyoriy muddatda qarzdorlikni to‘lash haqida tegishli talabnoma yuborilgan.
Biroq belgilangan muddatda qarzdorlik ixtiyoriy ravishda qoplanmaganligi sababli majburiy ijro harakatlariga kirishilgan.
Byuroning tuman bo‘limi tomonidan amalga oshirilgan majburiy ijro harakatlari natijasida qarzdordan 323 391 000 so‘m pul mablag‘i to‘liq undirilib, fuqaro B.V.ning tegishli hisob raqamiga o‘tkazib berilgan.
Qarzdorlik to‘liq qoplanganligi munosabati bilan mazkur ijro ishi O‘zbekiston Respublikasining “Sud hujjatlari va boshqa organlar hujjatlarini ijro etish to‘g‘risida”gi Qonunining 41-moddasiga asosan tamomlangan.
