Turkiyada yozgi mavsumning eng mashhur milliy taomlari ma’lum qilindi

Turkiyada gastronomik turizmga qiziqish ortib, mahalliy va an’anaviy taomlar sayyohlar uchun mamlakatga tashrif buyurishning muhim sabablaridan biriga aylanmoqda. Ayniqsa, yoz oylarida yengil va tetiklantiruvchi milliy taomlarga talab yuqori.

 

Tadqiqotlarga ko‘ra, bu yozda sayohat va turizm 79 foiz ko‘rsatkich bilan hordiq chiqarishning eng ommabop yo‘nalishi bo‘lgan. Taomlar bilan bog‘liq mashg‘ulotlar 70 foiz, ochiq havodagi faoliyatlar esa 69 foizni tashkil etgan.

 

 

Turkiyaning yozgi dasturxonida yangi sabzavot va mevalar, zaytun moyi, xushbo‘y ko‘katlar hamda dengiz mahsulotlari muhim o‘rin tutadi. Sovuq sho‘rvalar, zaytun moyida tayyorlangan sabzavotli taomlar, salatlar va uy ichimliklari issiq kunlarda ayniqsa mashhur.

 

Sharqiy Onado‘liga xos “ayran ashi” qatiq, no‘xat va bug‘doydan tayyorlanadigan sovuq sho‘rva bo‘lib, yozda iste’mol qilinadigan an’anaviy taomlardan biri hisoblanadi. Ushbu taomni mamlakatning yirik shaharlaridagi an’anaviy oshxonalarda ham uchratish mumkin.

 

 

Egey mintaqasida esa zaytun moyida tayyorlanadigan yashil loviya, qovoqcha, artishok hamda mahalliy ko‘katlardan tayyorlangan taomlar keng tarqalgan. Dolma, sarma, cho‘pon salati, kisir, mujver va merjimek ko‘ftesi ham yozgi dasturxonning mashhur taomlari qatoridan joy olgan.

 

Turkiyada uy taomlarini tatib ko‘rish uchun “esnaf lokantaları” ham sayyohlar orasida mashhur. Ushbu oshxonalarda har kuni yangi tayyorlanadigan, oilaviy retseptlarni eslatuvchi taomlar nisbatan hamyonbop narxlarda taklif etiladi.

 

 

Yozgi mavsumning mashhur desertlaridan biri esa Marash muzqaymog‘i hisoblanadi. Echki sutidan tayyorlanadigan ushbu muzqaymoq quyuq va cho‘ziluvchan tuzilishi, shuningdek, sekin erishi bilan ajralib turadi.

 

Mutaxassislar va turizm sohasi vakillarining ta’kidlashicha, Turkiyaning gastronomik merosi mamlakatning dengiz bo‘yi kurortlari, qadimiy shaharlari va tog‘li hududlariga sayohatni yanada jozibador qilmoqda.