Eron AQSh askarlarini qo‘lga olgan yoki o‘ldirganlar uchun mukofot belgiladi
Ayollar uchun mukofot miqdori ikki baravar bo‘lishi aytildi.
Eron armiyasi qo‘mondoni Amir Xotami AQSh harbiy xizmatchilarini qo‘lga olish yoki o‘ldirish uchun mukofot puli belgilanganini ma’lum qildi. Bu haqda Eron davlat televideniyesi xabar berdi.
Xotamining aytishicha, AQSh qo‘shinlari Eron hududiga bostirib kirgan taqdirda, amerikalik harbiy xizmatchini qo‘lga olgan, o‘ldirgan yoki tegishli organlarga topshirgan shaxsga 30 ming dollar yoki 50 milliard rial miqdorida mukofot beriladi.
Eron armiyasi qo‘mondoni bunday harakatni amalga oshirgan ayollarga mukofot miqdori ikki baravar to‘lanishini ham ta’kidlagan.
Shuningdek, Xotami Eron armiyasi AQSh harbiylariga qarshi ishlatilgan qurollarni bozor narxidan ikki baravar yuqori qiymatda qayta sotib olishga va ularning o‘rniga yangi qurollar berishga tayyorligini bildirgan.
