“Isroil mintaqadagi urushlarning asosiy harakatlantiruvchi kuchi” – Erdo‘g‘an
Turkiya prezidenti Anqara tinchlikka tahdid qilinadigan holatda urushdan qochmasligini bildirib, Isroilning G‘azo va Livandagi harbiy amaliyotlarini keskin tanqid qildi.
Turkiya prezidenti Rajab Toyyib Erdo‘g‘an Al Jazeera telekanaliga bergan intervyusida Isroilni Yaqin Sharqdagi urushlarning “asosiy harakatlantiruvchi kuchi va ishtirokchisi” deb atadi. Uning ta’kidlashicha, Isroil uzoq vaqt davomida harbiy yo‘lni ustun qo‘yib kelgan va buning oqibatida mintaqadagi boshqa davlatlar katta xarajatlarga duch kelgan.
Erdo‘g‘an Turkiyaga tinchlik emas, urush maqsadida hujum qilinadigan bo‘lsa, mamlakati jang qilishdan ikkilanmasligini aytgan.
Turkiya prezidenti, shuningdek, Isroilning G‘azo va Livandagi hujumlarini tanqid qilgan. Uning so‘zlariga ko‘ra, Isroil tomonidan bu hududlarda tajovuzkor yondashuv davom ettirilmoqda. Erdo‘g‘an G‘azodagi vaziyat haqida gapirar ekan, HAMASning “samimiy birdamlik” namoyish etganini, biroq Isroil tomonidan ijobiy yondashuv kuzatilmayotganini bildirgan.
Intervyuda Turkiyaning Yevropa Ittifoqiga a’zoligi masalasi ham tilga olingan. Erdo‘g‘an Yevropa 53 yildan beri Turkiyani qabul qilmaganini aytib, Yevropa Ittifoqiga a’zolik endilikda Anqaraning ustuvor vazifasi emasligini ta’kidlagan.
Turkiya prezidenti, shuningdek, Makka kelishuvi doirasidagi Turkiya, Saudiya Arabistoni va Pokiston o‘rtasidagi o‘zaro mudofaa kelishuvi haqida gapirib, uni NATO shartnomasining 5-moddasiga o‘xshash mexanizm sifatida baholagan.
