Muddatli to‘lov xizmatlari operatorlari faoliyati yo‘lga qo‘yiladi
Banklar va mikromoliya tashkilotlaridan tashqari, muddatli to‘lov xizmatlarini ko‘rsatuvchi yuridik shaxslar operator deb e’tirof etiladi.
O‘zbekistonda muddatli to‘lov xizmatlarini ko‘rsatish tartibi o‘zgaradi. Prezidentning 2026-yil 14-avgustdagi “Aholiga muddatli to‘lov xizmatlari ko‘rsatilishini takomillashtirish chora-tadbirlari to‘g‘risida”gi PQ-294-son qarori bilan soha uchun yangi qoidalar belgilandi.
Qarorga ko‘ra, 2027-yil 1-yanvardan muddatli to‘lov xizmati operatorlari faoliyati yo‘lga qo‘yiladi. Banklar va mikromoliya tashkilotlaridan tashqari, muddatli to‘lov xizmatlarini ko‘rsatuvchi yuridik shaxslar operator deb e’tirof etiladi.
Bunday tashkilotlar muddatli to‘lov xizmatlarini ko‘rsatishi uchun Markaziy bank tomonidan shakllantiriladigan maxsus reyestrga kiritilishi kerak. Banklar va mikromoliya tashkilotlari Markaziy bankni xabardor qilish orqali, boshqa yuridik shaxslar esa Markaziy bankda hisob ro‘yxatidan o‘tish orqali reyestrga kiritiladi.
Qarorda muddatli to‘lov xizmatining obyektlariga ham cheklovlar belgilangan. Jumladan, ko‘chmas mulk, shuningdek qonunchilikka muvofiq muomaladan chiqarilgan yoki muomalada bo‘lishi cheklangan boshqa mol-mulk muddatli to‘lov obyekti bo‘lishi mumkin emas.
Operatorlarga moliyaviy iste’mol kreditlarini ajratish hamda jismoniy shaxslardan pul mablag‘larini jalb qilish taqiqlanadi.
Shuningdek, muddatli to‘lov xizmatlari bo‘yicha talab qilish huquqidan faqat boshqa muddatli to‘lov xizmati operatori, mikromoliya tashkiloti yoki bank foydasiga voz kechish mumkin bo‘ladi.
Yangi tartib muddatli to‘lov xizmatlarini ko‘rsatuvchi tashkilotlarning faoliyatini tartibga solish va ushbu bozor ishtirokchilarining huquqiy maqomini aniq belgilashga qaratilgan.
