“Odil sudlov – 2030”: sud tizimida yangi islohotlar bosqichi
2027–2030-yillarda barcha tuman va shaharlarda fuqarolik ishlari bo‘yicha sudlar tashkil etiladi.
Prezident Shavkat Mirziyoyev tomonidan “Odil sudlov – 2030”: Yangi O‘zbekistonda inson huquqlarini ishonchli himoya qiluvchi xalqchil va adolatli sud tizimini barpo etish strategiyasi to‘g‘risidagi Farmon qabul qilindi.
Mazkur hujjat sud-huquq tizimini yanada takomillashtirish, fuqarolarning odil sudlovga erishish imkoniyatlarini kengaytirish hamda sud hokimiyatining mustaqilligi va samaradorligini mustahkamlashga qaratilgan.
Strategiyada sud tizimini aholiga yanada yaqinlashtirishga alohida e’tibor qaratilgan. Xususan, 2027–2030-yillar davomida respublikaning barcha tuman va shaharlarida fuqarolik ishlari bo‘yicha sudlarni bosqichma-bosqich tashkil etish ko‘zda tutilmoqda.
Fuqarolik ishlari bo‘yicha Mirzo Ulug‘bek tumanlararo sudi sudyasi Feruza Jo‘rayevaning ta’kidlashicha, mazkur tashabbus fuqarolarning sud himoyasidan foydalanish imkoniyatlarini yanada kengaytiradi.
“Bu, avvalo, chekka hududlarda yashovchi fuqarolarning sud himoyasiga erishishini kengaytirish hamda odil sudlovni aholiga yanada yaqinlashtirish nuqtai nazaridan muhim ahamiyat kasb etadi”, — deya qayd etdi sudya.
Yangi yondashuv fuqarolarning o‘z huquq va qonuniy manfaatlarini himoya qilish uchun sudga murojaat qilish imkoniyatlarini kengaytirish, sud xizmatlaridan foydalanishni qulaylashtirish va odil sudlovning aholiga yaqinligini ta’minlashga xizmat qiladi.
