Omskdagi yong‘inda jarohatlangan ikki o‘zbekistonlikning ahvoli og‘ir ekani ma'lum qilindi
Ulardan biri sun’iy nafas olish apparatiga ulangan, ikkinchisi ham reanimatsiya bo‘limida davolanmoqda.
Rossiyaning Omsk shahrida qurilayotgan binoda yuz bergan yong‘in oqibatida jarohatlangan ikki nafar O‘zbekiston fuqarosining ahvoli og‘ir ekani ma’lum qilindi. Bu haqda “Dunyo” axborot agentligi xabar berdi.
O‘zbekistonning Novosibirsk shahridagi bosh konsuli Aslam Akbarov 16-avgust kuni Omsk shahridagi 1-sonli tez tibbiy yordam shifoxonasiga borib, 15-avgust kuni “Kvartali Dravert” hududida yuz bergan yong‘inda jabrlangan O‘zbekiston fuqarolarining holidan xabar olgan.
Shifokorlar ma’lumotiga ko‘ra, I. Z. kuyish jarohatlari sabab reanimatsiya bo‘limiga yotqizilgan. Uning ahvoli og‘ir bo‘lib, sun’iy nafas olish apparatiga ulangan.
Ikkinchi fuqaro — O. E. ham reanimatsiya bo‘limida davolanmoqda. Uning ahvoli ham og‘ir deb baholanmoqda.
Ayni paytda rossiyalik shifokorlar moskvalik mutaxassislar bilan videokonferensiya orqali tibbiy konsilium o‘tkazib, jabrlanganlarning davolanish jarayonini muvofiqlashtirmoqda.
Mazkur holat O‘zbekistonning Novosibirsk shahridagi Bosh konsulxonasi tomonidan alohida nazoratga olingan.
