O‘zbekiston va Turkiya jurnalistlari media sohasidagi hamkorlikni kengaytiradi
Tomonlar jurnalistlar malakasini oshirish, raqamli media, sun’iy intellekt va zamonaviy texnologiyalar bo‘yicha qo‘shma loyihalarni muhokama qildi.
O‘zbekiston Jurnalistlar uyushmasi vakillari Turkiyaning Balikesir shahrida Balikesir jurnalistlar jamiyati tashkil etilganining 10 yilligi munosabati bilan o‘tkazilgan tadbirda ishtirok etdi.
Marosimda O‘zbekiston Jurnalistlar uyushmasi raisi Shuhrat Oripov O‘zbekiston va Turkiya o‘rtasida media sohasidagi hamkorlik izchil rivojlanib borayotganini ta’kidlab, Balikesir jurnalistlar jamiyati rahbariyati va a’zolarini yubiley sana bilan tabrikladi.
Tadbir doirasida Balikesir jurnalistlar jamiyati raisi Semra Aman Akyurek bilan uchrashuv o‘tkazilib, jurnalistika va media sohasidagi hamkorlikni kengaytirish masalalari muhokama qilindi.
Uchrashuv yakunida Balikesir jurnalistlar jamiyati hamda O‘zbekiston Jurnalistlar uyushmasining Buxoro viloyati bo‘limi o‘rtasida hamkorlikni yo‘lga qo‘yish bo‘yicha kelishuvga erishildi.
Hamkorlik doirasida jurnalistlar malakasini oshirish, raqamli media, sun’iy intellekt va zamonaviy texnologiyalar bo‘yicha qo‘shma o‘quvlar tashkil etish rejalashtirilmoqda. Shuningdek, Buxoro va Balikesir shaharlarida mediaforumlar, seminar-treninglar, mahorat darslari hamda onlayn ta’lim dasturlarini o‘tkazish masalalari ko‘rib chiqildi.
Tomonlar O‘zbekiston va Turkiya o‘rtasidagi do‘stlik va qardoshlik munosabatlarini, shuningdek, tarix, madaniyat, adabiyot, turizm, iqtisodiyot va gumanitar aloqalarni ommaviy axborot vositalari hamda ijtimoiy tarmoqlarda keng yoritishga qaratilgan qo‘shma media loyihalarni amalga oshirish muhimligini qayd etdi.
Kelgusida jurnalistika etikasi, ishonchli va xolis axborot tarqatish, faktlarni tekshirish, media savodxonlikni oshirish hamda dezinformatsiyaga qarshi kurashish yo‘nalishlarida ham hamkorlik qilish imkoniyatlari muhokama qilindi.
