Prezident “Tillo domor” korxonasining yangi ishlab chiqarish majmuasi faoliyati bilan tanishdi
Korxonada 70 dan ortiq turdagi sut mahsulotlari ishlab chiqarilib, yiliga qariyb 100 milliard so‘mlik mahsulot tayyorlanadi.
Prezident Shavkat Mirziyoyev Urganch tumanidagi “Tillo domor” korxonasining yangi ishlab chiqarish majmuasida sutni qayta ishlash va tayyor mahsulot ishlab chiqarish jarayoni bilan tanishdi.
Korxonaning umumiy qiymati 11 million dollar bo‘lib, yiliga qariyb 100 milliard so‘mlik mahsulot ishlab chiqarish quvvatiga ega. Majmua Bolgariyadan keltirilgan zamonaviy texnologik uskunalar bilan jihozlangan.
Bu yerda pishloq, qaymoq, smetana, tvorog, qatiq, kefir kabi 70 dan ortiq turdagi sut mahsulotlari ishlab chiqarilmoqda. Xomashyo har kuni 100 dan ziyod fermer xo‘jaligi va aholidan xarid qilinib, chorvachilik bilan shug‘ullanuvchilar uchun barqaror sotuv bozori yaratilmoqda.
Korxonada 120 ta ish o‘rni tashkil etilgan. Ishlab chiqarish majmuasiga 100 kilovatt quvvatga ega quyosh panellari ham o‘rnatilgan. Kelgusida mahsulot turlarini kengaytirish va yana 100 ta yangi ish o‘rni yaratish rejalashtirilgan.
Prezident mahalliy xomashyoni chuqur qayta ishlash, yuqori qo‘shilgan qiymatli mahsulotlar ishlab chiqarishni ko‘paytirish hamda korxonalarni xomashyo bilan barqaror ta’minlash muhimligini ta’kidlagan.
Mas’ullarga tadbirkorlik tashabbuslarini qo‘llab-quvvatlash, ishlab chiqarish hajmi va mahsulot turlarini oshirish bo‘yicha tegishli topshiriqlar berilgan.
