Slovakiya, Germaniya va Janubiy Koreyaga ishga yuborishni va’da qilganlar ushlandi
Ulardan biri 85 mln so‘m, boshqalari esa 4 ming va 5 900 AQSH dollari olayotgan vaqtida qo‘lga olingan.
Davlat xavfsizlik xizmati, Iqtisodiy jinoyatlarga qarshi kurashish departamenti va ichki ishlar organlari xodimlari hamkorligida o‘tkazilgan tezkor tadbirlar davomida fuqarolarni xorijga ishga yuborish bilan bog‘liq bir qator firibgarlik holatlariga chek qo‘yildi.
Jumladan, Toshkent shahrida yashovchi, 1985-yilda tug‘ilgan, muqaddam sudlangan shaxs Qashqadaryoda istiqomat qiluvchi 6 nafar fuqaroni Slovakiyaga ishga yuborishni va’da qilib, buning evaziga 145 mln so‘m talab qilgan. U oldindan 85 mln so‘m olayotgan vaqtida ashyoviy dalillar bilan ushlangan.
Boshqa holatda Toshkent shahrida xorijiy davlatlarga viza olish bo‘yicha konsalting xizmatlari ko‘rsatuvchi MCHJ rahbari 2002-yilda tug‘ilgan fuqaroni viza rasmiylashtirish orqali Germaniyaga ishga yuborishni va’da qilib, undan 4 ming AQSH dollari olgan vaqtida qo‘lga olingan.
Shuningdek, Toshkent viloyati Zangiota tumanida yashovchi, 1993-yilda tug‘ilgan ayol Angren shahrida istiqomat qiluvchi 2000-yilda tug‘ilgan fuqaroni viza rasmiylashtirish orqali Janubiy Koreyaga ishga yuborishni va’da qilib, 5 900 AQSH dollari olgan vaqtida ushlangan.
Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari olib borilmoqda.
