Tramp Makka kelishuvini Yaqin Sharqning birlashuvi deb atadi
AQSh prezidenti mazkur bitim mintaqa davlatlarining o‘zini himoya qilish imkoniyatlarini kuchaytirishini ta’kidlagan.
AQSh prezidenti Donald Tramp Saudiya Arabistoni, Turkiya va Pokiston o‘rtasida imzolangan Makka mudofaa kelishuvini Yaqin Sharq davlatlarining birlashuvi va mintaqada xavfsizlikni mustahkamlash yo‘lidagi muhim qadam sifatida baholadi. Bu haqda u Truth Socialdagi sahifasida yozib qoldirgan.
Tramp Saudiya Arabistoni, Turkiya va Pokiston rahbariyatini kelishuv imzolangani bilan tabriklab, uning Yaqin Sharq davlatlari o‘zini yanada samarali himoya qilish imkoniyatlarini kuchaytirishini ta’kidlagan.
Makka kelishuvi 7-avgust kuni Saudiya Arabistoni, Pokiston va Turkiya tomonidan imzolangan. Hujjatga ko‘ra, ishtirokchi davlatlardan biriga uyushtirilgan qurolli hujum barcha tomonlarga qarshi tajovuz sifatida baholanadi. Shuningdek, razvedka ma’lumotlari almashish va mintaqaviy xavfsizlikni ta’minlash borasida hamkorlikni kuchaytirish ko‘zda tutilgan.
Turkiya tashqi ishlar vaziri Hakan Fidan kelishuv mexanizmini NATOning jamoaviy mudofaani nazarda tutuvchi 5-moddasiga qiyoslagan.
Shuningdek, ayrim xabarlarga ko‘ra, kelgusida mintaqadagi boshqa davlatlar, jumladan, Misrning ham mazkur kelishuvga qo‘shilishi mumkin.
