Urganch xalqaro aeroportida yo‘lovchilarga xizmat ko‘rsatish quvvati soatiga 300 nafardan 1 ming 300 nafargacha ortadi
Prezident Urganch xalqaro aeroportining rasmiy delegatsiyalar uchun mo‘ljallangan yangi terminalini ko‘zdan kechirdi.
Prezident Shavkat Mirziyoyevning Xorazm viloyatiga tashrifi Urganch xalqaro aeroportidagi bunyodkorlik va rekonstruksiya ishlari bilan tanishishdan boshlandi.
Bugungi kunda Xorazmga kelayotgan sayyohlar va xorijiy mehmonlar oqimining ortib borayotgani aeroport infratuzilmasini zamonaviy talablar asosida rivojlantirishni taqozo etmoqda.
Urganch xalqaro aeroportini kengaytirish va modernizatsiya qilish loyihasiga 264 million dollar investitsiya yo‘naltirilgan. Loyiha davlat-xususiy sheriklik asosida amalga oshirilmoqda. Uning xususiy hamkori sifatida Janubiy Koreyaning “Incheon International Airport Corporation” kompaniyasi jalb etilgan.
Rekonstruksiya doirasida aeroportda “Boeing 747” va “Airbus A350” kabi keng fyuzelyajli samolyotlarni qabul qilish imkoniyati yaratiladi. Bu Xorazmga dunyoning turli qit’alaridan to‘g‘ridan-to‘g‘ri uzoq masofali aviaqatnovlarni yo‘lga qo‘yish imkonini beradi.
Loyihaning birinchi bosqichida 18 ta havo kemasi turargohi va yangi burilish yo‘lagi barpo etiladi. Shuningdek, zamonaviy chegara nazorati va viza bo‘limlari, biznes-zal, savdo va ovqatlanish shoxobchalari, tibbiyot punkti hamda “Duty Free” zonasi tashkil etiladi.
Loyiha yakunlangach, aeroportning yo‘lovchilarga xizmat ko‘rsatish quvvati soatiga 300 nafardan 1 ming 300 nafargacha oshiriladi.
Prezident aeroportning modernizatsiyasi Xorazmning turistik salohiyatini yanada oshirish, xalqaro aloqalarni kengaytirish va hududda yirik xalqaro tadbirlarni o‘tkazish uchun zarur infratuzilmani shakllantirishda muhim ahamiyatga ega ekanini ta’kidladi.
