Yoshlar zamonaviy mehnat bozorida talab yuqori bo‘lgan kasblarga o‘qitiladi

Prezident Shavkat Mirziyoyev Urganch shahridagi Xorazm ilg‘or kasbiy mahorat texnikumi hamda uning hududida tashkil etilgan Kasblar shaharchasi faoliyati bilan tanishdi.

 

Mazkur muassasada mehnat bozori talablariga mos, zamonaviy bilim va amaliy ko‘nikmalarga ega mutaxassislarni tayyorlashga alohida e’tibor qaratilgan. Ta’lim jarayonida ish beruvchilar ehtiyoji, ilg‘or xorijiy tajriba va dual ta’lim tizimi uyg‘unlashtirilgan.

 

Texnikumni tashkil etish uchun davlat budjetidan 72,4 milliard so‘m ajratilgan. 5,2 gektar maydonda 1 ming 100 o‘ringa mo‘ljallangan ikkita o‘quv binosi, 300 o‘rinli yotoqxona, sport zali, 200 o‘rinli oshxona va zamonaviy jihozlangan o‘quv ustaxonalari barpo etilgan.

 

Bu yerda Germaniya, Shveysariya, Buyuk Britaniya, Xitoy va Janubiy Koreyaning ilg‘or ta’lim dasturlari asosida mutaxassislar tayyorlanmoqda. 2026–2027-o‘quv yili uchun 11 ta kasb yo‘nalishiga 200 nafar iqtidorli yosh imtihon asosida saralangan.

 

Ta’lim ish beruvchi korxonalar bilan hamkorlikda tashkil etilib, yoshlarning egallagan kasbi bo‘yicha bandligini ta’minlashga e’tibor qaratilmoqda.

 

Texnikum nafaqat o‘z o‘quvchilari, balki viloyatdagi boshqa kasbiy ta’lim muassasalari uchun ham amaliy baza vazifasini bajarmoqda. Hozirda hududdagi ta’lim muassasalarining qariyb 4 ming 300 nafar o‘quvchisi mazkur majmuaning ustaxona va laboratoriyalarida amaliyot o‘tamoqda.

 

Davlatimiz rahbari Kasblar shaharchasida yaratilgan sharoitlar bilan ham tanishdi. Bu yerda yoshlarning qiziqish va qobiliyatini erta aniqlash, ularni kasbga yo‘naltirish hamda amaliy ko‘nikmalarini rivojlantirish imkoniyatlari yaratilgan.

 

Shaharchada “O‘zing yasab ko‘r” tamoyili asosida transport va logistika, sanoat va qurilish, servis, qishloq xo‘jaligi hamda “yashil” energetika kabi yo‘nalishlar bo‘yicha mashg‘ulotlar tashkil etilgan.

 

Prezident yoshlarni zamonaviy mehnat bozori talablariga mos kasblarga sifatli tayyorlash, ta’lim dasturlarini ish beruvchilar ehtiyojiga moslashtirish va Xorazmdagi ilg‘or tajribani boshqa hududlarda ham kengaytirish muhimligini ta’kidladi.