Andijonda YPXdan qochishga uringan Onix haydovchisi YTHga uchradi
Qochish vaqtida boshqaruvni yo‘qotgan avtomobil do‘konga urilgan.
Andijon shahrida tegishli hujjatlarsiz Onix boshqargan haydovchi YPX xodimining to‘xtash talabiga bo‘ysunmay, qochishga uringan. Harakat davomida u rul boshqaruvini yo‘qotib, yo‘l chetidagi do‘konga borib urilgan. Bu haqda viloyat YHXB matbuot xizmati xabar berdi.
Hodisa 17-avgust kuni soat 01:10 atrofida Mashrab ko‘chasida sodir bo‘lgan. YPX xodimlari Onix haydovchisiga to‘xtash ishorasini bergan, biroq u qonuniy talabni bajarmasdan Lomonosov ko‘chasi tomon harakatini davom ettirgan.
Shundan so‘ng haydovchi boshqaruvni yo‘qotib, avtomobilni yo‘l chetidagi do‘konga urgan.
Tekshiruv davomida 1999-yilda tug‘ilgan U. M. avtomashinani tegishli hujjatlarsiz boshqargani aniqlangan. Shuningdek, transport vositasiga nisbatan muddati o‘tgan 10 million so‘mdan ortiq qarzdorlik mavjudligi ma’lum bo‘lgan.
Holat yuzasidan haydovchiga Ma’muriy javobgarlik to‘g‘risidagi kodeksning 135-moddasi 2-qismi hamda 194-moddasi 1-qismi bilan ma’muriy bayonnoma rasmiylashtirilgan. Avtomobil vaqtincha saqlash uchun jarima maydoniga joylashtirilgan.
YTH oqibatida hech kim tan jarohati olmagan, biroq avtomobilga texnik shikast yetgan. Hozirda holat yuzasidan belgilangan tartibda surishtiruv ishlari olib borilmoqda.
