Birinchi xato uchun tadbirkorga jarima emas, 10 kunlik muddat beriladi

 

Prezident Shavkat Mirziyoyev tadbirkorlar bilan ochiq muloqotda biznes vakillariga nisbatan qo‘llanayotgan nazorat va ma’muriy choralarni yanada takomillashtirish bo‘yicha yangi tashabbuslarni ma’lum qildi.

 

Hozirda mamlakatda 51 ta idora moliyaviy jarima qo‘llash vakolatiga ega. Ayrim idoralarda jarimalardan tushgan mablag‘ning bir qismi o‘sha tashkilot ixtiyorida qolayotgani tanqid qilindi. Bu esa nazoratni profilaktikadan ko‘ra jarima undirishga yo‘naltiruvchi noto‘g‘ri yondashuvni yuzaga keltirayotgani qayd etildi.

 

“Jarima mablag‘ yig‘ish uchun emas, sohada tartib-intizom va profilaktika uchun xizmat qilishi kerak”, — dedi Prezidentimiz.

 

Shu munosabat bilan barcha turdagi jarimalar miqdori o‘rtacha ikki barobarga kamaytiriladi.

 

Shuningdek, davlat korxonalari tomonidan xarid qilingan tovarlar bo‘yicha tadbirkorlarning zakalat mablag‘larini qaytarish jarayoni avtomatlashtiriladi.

 

Kelasi yildan tadbirkor va davlat o‘rtasidagi nizolarda “Tadbirkorning haqlilik prezumpsiyasi” tamoyili amal qiladi.

 

Unga ko‘ra, tadbirkorning aybi sudda isbotlanmaguncha u aybsiz hisoblanadi. Shunga ko‘ra, aybi sud orqali tasdiqlanmaguncha tadbirkorga jarima yoki boshqa ta’sir chorasi qo‘llanmaydi.

 

Bundan tashqari, “Birinchi xato uchun ogohlantirish” qoidasi joriy etiladi.

 

Birinchi marta qoidabuzarlik sodir etgan, biroq odamlar hayoti, sog‘lig‘i yoki mol-mulkiga zarar yetkazmagan tadbirkorga kamchilikni bartaraf etish uchun 10 kun muddat beriladi.

 

Sud jarayonlarida ham tadbirkorlar manfaatini himoya qilishga qaratilgan yangi tartiblar joriy etiladi. Xususan, nazorat organlari birinchi instansiyadan keyingi har bir sud bosqichida davlat bojini to‘laydi.

 

Shuningdek, Savdo-sanoat palatasi huzuridagi Ekspert kengashining vakolatlari kengaytiriladi. Endilikda kengashga bojxona, qurilish, sanitariya, karantin va veterinariya sohalaridagi nizolarni ham ko‘rib chiqish vakolati beriladi.