G‘azoda qurolsizlanish va gumanitar masalalar bo‘yicha ikki ishchi guruh tuziladi
Qaror Netanyaxu va Tinchlik Kengashi vakillari ishtirokidagi muzokaralarda qabul qilindi.
Isroil Bosh vaziri Benyamin Netanyaxu va Tinchlik Kengashi vakillari G‘azo sektoridagi vaziyat bo‘yicha ikki ishchi guruh tuzish to‘g‘risida kelishib oldi. Bu haqda TASS Netanyaxu idorasiga tayanib ma’lum qildi.
Quddusda AQSh prezidenti Donald Trampning kuyovi Jared Kushner ishtirokida o‘tkazilgan muzokaralarda G‘azoni demilitarizatsiya qilish va hududdagi gumanitar vaziyatni yaxshilash masalalari muhokama qilingan.
Birinchi ishchi guruh G‘azoni qurolsizlantirish va demilitarizatsiya qilish masalalari bilan shug‘ullanadi. Tomonlar anklavda qayta qurish ishlari boshlanishidan avval demilitarizatsiya jarayoni yakunlanishi kerakligini ta’kidlagan.
Ikkinchi guruh esa sanitariya, toza suv ta’minoti va G‘azo aholisining boshqa sog‘liqni saqlash ehtiyojlari bilan bog‘liq masalalarga e’tibor qaratadi.
Isroil tomoni G‘azoni qayta tiklash jarayonining boshlanishi uchun Hamasning qurollarini topshirishini talab qilmoqda. Bu jarayon AQSh nazorati ostida amalga oshirilishi rejalashtirilayotgani aytilmoqda.
Avvalroq Netanyaxu Tinchlik Kengashining G‘azo bo‘yicha 15 banddan iborat rejasini rad etishi va Hamas to‘liq qurolsizlantirilmaguncha Isroil qo‘shinlarini hududdan olib chiqmasligini bildirgan edi.
