Imron Xon sog‘lig‘i sabab qamoqxonadan kasalxonaga o‘tkazildi

 

Pokiston Oliy sudi korrupsiya ayblovi bilan qamoq jazosini o‘tayotgan sobiq bosh vazir Imron Xonni sog‘lig‘i bilan bog‘liq muammolar sabab kasalxonaga o‘tkazish haqida qaror qabul qildi. Bu haqda Geo tv xabar berdi.

 

Sud qaroriga ko‘ra, Imron Xon navbatdagi sud majlisigacha tibbiy ko‘rik va davolanish uchun Shifa kasalxonasiga yuboriladi. Shuningdek, sud tegishli idoralarga siyosatchining to‘liq tibbiy ma’lumotlarini taqdim etish bo‘yicha ko‘rsatma bergan.

 

Sud muxolifatdagi Adolat uchun harakat partiyasidan sobiq bosh vazirning sog‘lig‘i bilan bog‘liq masalani siyosiylashtirmaslikni ham so‘ragan.

 

Avvalroq, fevral oyida Imron Xonning advokatlari uning sog‘lig‘i yomonlashgani sababli qamoqdan ozod etilishini so‘rab sudga murojaat qilgan edi. Xususan, qon quyqasi uning o‘ng ko‘zidagi ko‘rish qobiliyatiga jiddiy ta’sir ko‘rsatgani bildirilgan.

 

Advokatlar, shuningdek, 2025-yil dekabrida chiqarilgan hukm ijrosini to‘xtatishni so‘ragan. Ushbu hukmga ko‘ra, Imron Xon davlat aktivlari — zargarlik buyumlari va qimmatbaho soatlar qiymatini ataylab kamaytirib ko‘rsatish bilan bog‘liq korruptsiya ishi bo‘yicha 17 yilga ozodlikdan mahrum etilgan.

 

Imron Xon 2018–2022-yillarda Pokiston bosh vaziri lavozimida ishlagan. U 2022-yil 10-aprelda parlamentdagi ishonchsizlik votumidan so‘ng lavozimidan chetlatilgan.

 

Uning rafiqasi Bushra Bibi ham shu ish doirasida yetti yilga ozodlikdan mahrum etilgan.