Mandat natijalari e’lon qilindi: 209 mingdan ortiq abituriyent talaba boʻldi
Bu yil oliy ta’limga qabulda davlat granti bo‘yicha o‘rtacha o‘tish bali 134,6 ball, kontrakt bo‘yicha 93,7 ballni tashkil etdi.
2026/2027-o‘quv yili uchun oliy ta’lim muassasalarining bakalavriat ta’lim yo‘nalishlariga qabulning yakuniy natijalari e’lon qilindi.
18-avgust kuni Oliy ta’lim, fan va innovatsiyalar vazirligida o‘tkazilgan matbuot anjumanida qayd etilishicha, joriy yilda 209,1 ming nafar abituriyent bakalavriat ta’lim yo‘nalishlariga talabalikka tavsiya etilgan.
Shundan 52,8 ming nafari davlat granti, 156,3 ming nafari esa to‘lov-kontrakt asosida o‘qishga tavsiya etilgan. Shuningdek, belgilangan imtiyozlar asosida alohida qabul ko‘rsatkichlari doirasida yana 20,5 ming nafar abituriyent talabalikka tavsiya etilgan.
Bu yil davlat granti bo‘yicha o‘rtacha o‘tish bali 134,6 ball, to‘lov-kontrakt bo‘yicha esa 93,7 ballni tashkil etdi.
Taqqoslash uchun, 2025/2026-o‘quv yilida o‘rtacha o‘tish ballari grant bo‘yicha 121,8 ball, kontrakt bo‘yicha 84,9 ball bo‘lgan. Shu tariqa, bir yil davomida grant bo‘yicha o‘rtacha o‘tish bali 12,8 ballga, kontrakt bo‘yicha esa 8,8 ballga oshgan.
Vazirlik ma’lumotlariga ko‘ra, joriy yilda abituriyentlar eng ko‘p tanlagan oliy ta’lim muassasalari qatoridan Toshkent davlat iqtisodiyot universiteti, O‘zbekiston davlat jahon tillari universiteti va O‘zbekiston Milliy universiteti joy oldi.
Ta’lim yo‘nalishlari orasida esa eng yuqori qiziqish «Davolash ishi», «Iqtisodiyot» hamda «Filologiya va tillarni o‘qitish: ingliz tili» yo‘nalishlariga kuzatilgan.
