“Odamlarimiz chetga chiqib ishlashiga zarurat qolmaydi” — Shavkat Mirziyoyev

 

Prezident Shavkat Mirziyoyev tadbirkorlar bilan ochiq muloqot yakunida mamlakat iqtisodiyotini yanada rivojlantirish va yuqori o‘sish sur’atlarini saqlab qolish bo‘yicha ustuvor vazifalarni belgilab berdi.

 

“Biz 40 millionli xalqmiz. Odamlarimiz hayotini yanada yaxshilash uchun yuqori iqtisodiy o‘sishni saqlab qolishimiz zarur”, — dedi davlat rahbari.

 

Qayd etilganidek, joriy yilda yalpi ichki mahsulotni 180 milliard dollardan, eksport hajmini esa 40 milliard dollardan oshirish maqsad qilingan.

 

Bu borada tadbirkorlar uchun yuqori daromadli ish o‘rinlari yaratish, qo‘shilgan qiymat zanjirlarini kengaytirish va tashqi bozorlarga chiqish imkoniyatlarini oshirish uchun zarur sharoitlar yaratiladi.

 

Hududlarning iqtisodiy salohiyatidan kelib chiqib, yangi o‘sish nuqtalari shakllantiriladi. Jumladan:

• Toshkentda eksportga yo‘naltirilgan biznes;

• Andijon, Farg‘ona va Namanganda to‘liq ishlab chiqarish zanjiriga ega to‘qimachilik va mashinasozlik;

• Samarqand, Buxoro va Xorazmda turizm, kreativ industriya va agrosanoat brendlari;

• Navoiy va Toshkent viloyatlarida tog‘-kon, metallurgiya va ilmiy kimyo;

• Qashqadaryo va Surxondaryoda agrosanoat hamda neft-gaz kimyosi;

• Qoraqalpog‘istonda “yashil” energetika, axborot texnologiyalari va sun’iy intellekt;

• Jizzax va Sirdaryoda avtomobilsozlik, elektrotexnika va qurilish materiallari bo‘yicha raqobatbardosh klasterlar rivojlantiriladi.

 

Davlatimiz rahbari hududlarda aynan shu yo‘nalishlar bo‘yicha uzun qo‘shilgan qiymat zanjirlarini yaratish, ishlab chiqarish va eksportni ko‘paytirish muhimligini ta’kidladi.

 

“Ana shunda odamlarimiz chetga chiqib ishlashiga zarurat qolmaydi, Yangi O‘zbekiston tadbirkorlari yangi rivojlanish bosqichiga chiqadi. Ishonchim komil, bunga kuchimiz ham, imkoniyatimiz ham, salohiyatimiz ham yetadi!” — dedi Prezident.