O‘zbekistonda 27 milliard dollarlik 105 ta yirik loyiha boshlanadi
Jizzaxdagi AES, Olmaliqdagi to‘rtinchi mis boyitish fabrikasi, Yangi Toshkent aeroporti va yangi avtomobil yo‘llari — mamlakatda amalga oshirilayotgan yirik loyihalar qatorida.
Mamlakatda iqtisodiy o‘sishni yangi bosqichga olib chiqish, sanoat va infratuzilmani rivojlantirishga xizmat qiladigan yirik investitsiya loyihalari izchil amalga oshirilmoqda.
Jumladan, Jizzaxda atom elektr stansiyasi, Olmaliqda to‘rtinchi mis boyitish fabrikasi, shuningdek “Toshkent – Samarqand” va “Toshkent – Andijon” zamonaviy avtomobil yo‘llari qurilmoqda.
Hududlarda ham strategik loyihalar amalga oshirilmoqda. Xorazmda ekologik aviayoqilg‘i majmuasi, Surxondaryoda 940 gektarlik zamonaviy issiqxona majmuasi, Yuqori Chirchiqda esa Yangi Toshkent xalqaro aeroporti bunyod etilmoqda.
Joriy yilda umumiy qiymati 27 milliard dollar bo‘lgan 105 ta yangi sanoat va infratuzilma loyihasini boshlash rejalashtirilgan.
Shuningdek, mamlakatning barcha hududlarida jami 3 million nafar aholi uchun yangi massivlar barpo etilmoqda. Mazkur loyihalarda o‘z mahsuloti va xizmatlari bilan ishtirok etishni istagan mahalliy tadbirkorlarga xorijiy investorlar bilan teng sharoitlar yaratib beriladi.
Transport-logistika sohasida ham tadbirkorlar uchun qo‘shimcha imkoniyatlar kengaytirilmoqda. Xususan, yuk avtomobillarini import qilishda bojxona boji va utilizatsiya yig‘imi bekor qilindi. Xalqaro tashuvlar uchun vagon taqdim etishda qo‘shilgan qiymat solig‘i stavkasini nol foizga tushirish ko‘zda tutilmoqda.
Kelgusi yilda Gruziyaning Poti portida yillik quvvati 500 ming tonna bo‘lgan logistika markazi ishga tushiriladi. Anakliya porti loyihasi bo‘yicha ham amaliy ishlar boshlanadi.
Bundan tashqari, Olot, Termiz, Yangiyo‘l, Ohangaron va Xonobod shaharlarida yirik transport-logistika markazlari tashkil etiladi.
Kelgusi yilda Toshkent xalqaro moliya markazi hamda “Enterprise Uzbekistan” xalqaro raqamli texnologiyalar markazini ishga tushirish rejalashtirilgan.
Ushbu markazlar orqali mamlakatga 20–25 milliard dollar miqdorida kapital, shuningdek yangi bilim, ilg‘or texnologiyalar va xalqaro tajribani jalb etish uchun qo‘shimcha imkoniyatlar yaratiladi.
