O‘zbekistonda ko‘p qavatli uylar liftlari uchun yangi talablar belgilandi
Tegishli o‘zgartirishlar uch oydan keyin kuchga kiradi.
O‘zbekistonda ko‘p qavatli uylardagi liftlarni ishlatish va ularga texnik xizmat ko‘rsatish tartibiga yangi talablar kiritildi. Tegishli o‘zgartirishlar Adliya vazirligi tomonidan davlat ro‘yxatidan o‘tkazildi. Yangi qoidalar uch oy o‘tib kuchga kiradi.
Unga ko‘ra, ko‘p qavatli uylarni boshqarish organlari liftlarning butun xizmat muddati davomida uzluksiz va xavfsiz ishlashini ta’minlashi shart. Liftlar faoliyati ustidan dispetcherlik nazorati ham yo‘lga qo‘yiladi.
Shuningdek, lift kabinalari operator bilan ikki tomonlama ovozli aloqa imkonini beruvchi vizual va ovozli signalizatsiya bilan jihozlanishi kerak. Shaxta, mashina xonasi va blok eshiklarining ochilishi hamda yopilishini ko‘rsatuvchi vizual signalizatsiya tizimlari ham bo‘lishi talab etiladi.
Har bir lift kabinasida uning yuk ko‘tarish quvvati va yo‘lovchilarning ruxsat etilgan soni, “Xavfsiz lift” elektron platformasidagi ro‘yxatga olish raqami, davriy texnik ko‘rikdan o‘tkazilgani haqidagi ma’lumotlar hamda liftga xizmat ko‘rsatuvchi tashkilot yoki avariya xizmatining telefon raqami ko‘rsatilishi lozim.
O‘zgartirishlar ko‘p qavatli uylarning umumiy foydalanish joylariga oid ayrim talablarni ham yangilaydi. Jumladan, kirish yo‘laklari va zinapoyalarni haftasiga kamida bir marta tozalash talabi saqlab qolinadi, ularni oyiga kamida bir marta, jumladan devorlarni tozalash bo‘yicha alohida talab esa bekor qilinadi.
Bundan tashqari, ko‘p qavatli uylarning kirish joylariga sovutish va isitish moslamalari, jumladan split tizimlar o‘rnatish taqiqlanadi. Balkon va lodjiyalarning ichki qismiga bunday qurilmalarni o‘rnatishga esa binoning tashqi ko‘rinishiga zarar yetkazilmagan taqdirda ruxsat beriladi.
