Tadbirkorlar uchun “kontr-kafolat” tizimi joriy etiladi
10 milliard so‘mgacha kreditda garovning 75 foizi davlat, Biznesni kafolatlash kompaniyasi va banklar tomonidan ta’minlanadi.
Prezident Shavkat Mirziyoyev tadbirkorlar bilan ochiq muloqotda kichik biznes vakillari uchun muhim bo‘lgan garov ta’minoti masalasini yengillashtirish bo‘yicha yangi tizim joriy etilishini ma’lum qildi.
Unga ko‘ra, biznesning haqiqiy qiymatini baholash asosida kredit ajratish imkonini beradigan “kontr-kafolat” tizimi yo‘lga qo‘yiladi.
Mazkur tizim doirasida 10 milliard so‘mgacha bo‘lgan kreditlar uchun garov ta’minotining 30 foizini davlat, yana 30 foizini Biznesni kafolatlash kompaniyasi, 15 foizini esa banklar o‘z zimmasiga oladi. Natijada tadbirkorning o‘zidan garovning atigi 25 foizini ta’minlash talab etiladi.
Shuningdek, tadbirkorlarga soliq masalalarida ko‘maklashadigan “Virtual soliq maslahatchisi” ishga tushirildi. Kelasi yildan boshlab sun’iy intellekt yordamchilari qurilish, mehnat munosabatlari, tashqi savdo va davlat xizmatlari sohalarida ham joriy etiladi.
Ochiq muloqotda hududlarda mavjud bo‘sh imkoniyatlardan samarali foydalanish masalasiga ham alohida e’tibor qaratildi.
Davlat rahbari minglab gektar bo‘sh yer maydonlari va samarasiz foydalanilayotgan davlat aktivlari faqat ular asosida yangi loyihalar amalga oshirilib, ish o‘rinlari yaratilsa va eksport ta’minlansa, haqiqiy iqtisodiy qiymat yaratishini ta’kidladi.
Shu maqsadda davlat aktivlarini sotib olish shartlari ham yengillashtiriladi. Xususan, avans to‘lovi 30 foizdan 15 foizga tushiriladi. Aktiv qiymatini olti oy ichida to‘liq to‘lagan tadbirkorlarga 25 foiz chegirma beriladi.
Shuningdek, xarid qiymatining 50 foizini to‘lagan tadbirkor qolgan summani 7 yil davomida foizsiz bo‘lib to‘lashi mumkin bo‘ladi.
Uch oy davomida sotilmagan davlat mulkining boshlang‘ich narxi bosqichma-bosqich 10 foizgacha pasaytiriladi. Auksionlarni o‘tkazish muddati esa ikki barobar qisqartiriladi.
