Tadbirkorlikka oid davlat xizmatlarining 50 foizi “sukut – rozilik” tamoyiliga o‘tkaziladi
Ariza belgilangan muddatda ko‘rib chiqilmasa, u tadbirkor foydasiga hal qilingan hisoblanadi.
Prezident Shavkat Mirziyoyev tadbirkorlar bilan ochiq muloqotda biznes yuritish uchun zarur davlat xizmatlari va ruxsat berish tartib-taomillarini yanada soddalashtirish bo‘yicha yangi choralarni belgiladi.
Endilikda tadbirkorlikka oid davlat xizmatlarining 50 foizi “sukut – rozilik” tamoyiliga o‘tkaziladi. Ya’ni tadbirkorning arizasi belgilangan muddatda ko‘rib chiqilmasa, u avtomatik ravishda tadbirkor foydasiga hal qilingan deb hisoblanadi.
Litsenziya olish bo‘yicha rad etilgan har bir ariza Biznes-ombudsman tomonidan o‘rganib chiqiladi. Asossiz ravishda rad etganlik uchun mas’ul shaxslarning javobgarligi kuchaytiriladi.
Shuningdek, tadbirkorlar uchun ortiqcha ma’muriy to‘siqlar qisqartiriladi. Yaqin vaqt ichida 30 dan ortiq faoliyat turi bo‘yicha litsenziya va ruxsatnomalar bekor qilinadi. Yana 35 ta litsenziya va ruxsatnomani olish muddati 2–3 barobarga qisqartiriladi.
Bundan tashqari, 10 ta ruxsat berish tartibi xabardor qilish tartibiga o‘tkaziladi.
Oziq-ovqat mahsulotlarini eksport qilishda ham hujjatlarni rasmiylashtirish soddalashtiriladi. Veterinariya, sanitariya va fitosanitariya ruxsatnomalari o‘rniga yagona “Salomatlik sertifikati” joriy etiladi.
Yangi litsenziya yoki ruxsatnoma talabini joriy etishdan avval esa uning amaliy samaradorligi uchta hududda olti oy davomida eksperiment tariqasida sinovdan o‘tkaziladi.
Muloqotda tadbirkorlar mulkiga ijro hujjatlari asosida taqiq qo‘yilishi bilan bog‘liq murojaatlar ko‘pligi ham qayd etildi. Mazkur masalalar yuzasidan alohida uchrashuv o‘tkazilib, ularning tizimli yechimlari ishlab chiqiladi.
