Xorazm tadbirkorlar uchun yangi imkoniyatlar markaziga aylanmoqda — Prezident
Xorazmga qisqa davrda 4 milliard dollar xorijiy investitsiya jalb qilinib, 10 mingta yangi ishlab chiqarish quvvati ishga tushirildi.
Prezident Shavkat Mirziyoyev Xorazmda so‘nggi yillarda tadbirkorlikni rivojlantirish uchun mutlaqo yangi imkoniyatlar yaratilganini ta’kidladi.
Qayd etilganidek, qisqa davrda viloyat iqtisodiyotiga 4 milliard dollar xorijiy investitsiya jalb qilinib, 10 mingta yangi ishlab chiqarish quvvati ishga tushirildi. Hududda “Hazorasp” maxsus iqtisodiy zonasi va 31 ta sanoat zonasi tashkil etildi.
Tuproqqal’a va Yangiariq tumanlarida umumiy quvvati 275 megavatt bo‘lgan elektr stansiyalari barpo etilib, sanoat korxonalarining barqaror energiya ta’minotiga xizmat qilmoqda.
Bugungi kunda Xorazm iqtisodiyotining 72 foizi kichik biznes hissasiga to‘g‘ri kelmoqda. Eksportda kichik biznes ulushi esa 81 foizga yetib, viloyat bu ko‘rsatkich bo‘yicha respublikada birinchi o‘ringa chiqdi.
Transport infratuzilmasi ham sezilarli darajada rivojlandi. Haftalik aviareyslar soni 16 tadan 102 taga, temir yo‘l qatnovlari esa 8 tadan 41 taga oshdi. “Toshkent – Xiva” tezyurar poyezdi qatnovi yo‘lga qo‘yildi, 35 kilometrlik yangi “Urganch – Xiva” avtomobil yo‘li foydalanishga topshirilmoqda.
Turizm sohasida ham yangi loyihalar amalga oshirilmoqda. 25 gektar maydonda “Arda Xiva” turistik majmuasi barpo etildi. Tadbirkorlar tomonidan jami 7 ming o‘rinli 331 ta mehmonxona va mehmon uyi tashkil qilindi.
Joriy yilda Xorazmga 3 million nafar xorijiy sayyoh kelishi kutilmoqda. Xivada mehmonxona, savdo va ko‘ngilochar obyektlarni o‘z ichiga olgan “Sahro yulduzi” turistik kompleksi ham bunyod etilishi rejalashtirilgan.
“Bir so‘z bilan aytganda, bugun Xorazm tadbirkorlar uchun yangi imkoniyatlar markaziga aylanib bormoqda”, — dedi Prezident.
