Yangi tadbirkorlarga 200 million so‘mgacha garovsiz kredit beriladi

 

Prezident Shavkat Mirziyoyev tadbirkorlar bilan ochiq muloqotda ular tomonidan ko‘tarilgan masalalar asosida biznesni rivojlantirishga qaratilgan yangi tashabbuslarni ilgari surdi.

 

Davlat rahbari ta’kidlaganidek, birinchi yo‘nalish tadbirkorlik uchun barqaror o‘sish trayektoriyasini ta’minlashdan iborat.

 

So‘nggi yillarda banklar kredit portfelida kichik biznes ulushi 45 foizdan 63 foizga oshgan. Joriy yilning birinchi yarim yilligida kichik va o‘rta biznesni moliyalashtirish uchun 76,5 trillion so‘m resurs ajratilgan.

 

Tadbirkorlarning kredit olish imkoniyatlarini yanada kengaytirish maqsadida yaqinda “Kredit xizmatlari yagona raqamli portali” ishga tushirildi. Endilikda tadbirkor bitta ariza topshiradi va banklar uning loyihasi uchun o‘zaro raqobat qiladi.

 

Shuningdek, faoliyatini endi boshlayotgan tadbirkorlar uchun 5 milliard so‘mgacha kreditni onlayn rasmiylashtirish imkoniyati yaratiladi.

 

Endilikda biznesning har bir bosqichiga mos yaxlit qo‘llab-quvvatlash ekotizimi shakllantiriladi. Shu doirada:

• yangi tadbirkorlar uchun “Biznes start”;

• ishlab chiqarishni yo‘lga qo‘yganlar uchun “Biznes lift”;

• yangi o‘sish bosqichiga chiqayotgan biznes vakillari uchun “Biznes yuksalish” dasturlari joriy etiladi.

 

“Biznes start” dasturi orqali yangi tadbirkorlar sun’iy intellekt texnologiyalaridan foydalangan holda biznes loyiha tayyorlash, kredit hujjatlarini rasmiylashtirish va hisobotlarni yuritish ko‘nikmalariga ega bo‘ladi.

 

Mazkur maqsadlarga 100 milliard so‘m yo‘naltiriladi. Dastur doirasida tadbirkorlarga tayyor biznes-rejalar hamda 200 million so‘mgacha garovsiz kredit taqdim etiladi.

 

“Tadbirkorga kredit berish emas, uni birinchi qadamidan katta biznesga aylangunicha boshidan oxirigacha qo‘llab-quvvatlaydigan kompleks tizim yaratamiz”, — dedi davlat rahbari.