Andijonda 11 kilogrammdan ortiq marixuana sotayotgan shaxs ushlandi
U giyohvandlik moddasini internet va ijtimoiy tarmoqlar orqali ham sotishga uringan.
Andijon viloyati IIB Tezkor-qidiruv xizmati xodimlari tomonidan “Qora dori — 2026” keng qamrovli tezkor-profilaktik tadbiri doirasida Izboskan tumanida tezkor tadbir o‘tkazildi.
Tadbir davomida 1989-yilda tug‘ilgan shaxs tuman hududidagi qabristonlardan birida sof og‘irligi 11 kilogrammdan ortiq marixuanani 6 million so‘m evaziga sotayotgan vaqtida ashyoviy dalillar bilan ushlangan.
Dastlabki surishtiruvlarda gumonlanuvchi giyohvandlik moddasini faqat bevosita uchrashuvlar orqali emas, balki internet va ijtimoiy tarmoqlardan foydalangan holda ham sotishga uringani aniqlangan. Xususan, u ehtimoliy xaridorlarga marixuana taklif qiluvchi video xabarlar yuborib kelgan.
Mazkur holat yuzasidan Jinoyat kodeksining 273-moddasi 6-qismi “a” bandi bilan jinoyat ishi qo‘zg‘atilgan. Hozirda tergov harakatlari olib borilmoqda.
