AQSH Eronni “bo‘g‘ib qo‘yish” taktikasini tanladi — CNN

 

AQSh prezidenti Donald Tramp ma’muriyat rasmiylariga Eron bilan muzokaralarni to‘xtatish bo‘yicha ko‘rsatma bergan. Bu haqda CNN AQSh rasmiysiga tayanib xabar berdi.

 

Nashr manbasining ma’lum qilishicha, Vashington Eron bilan munosabatlarda avvalgi yondashuvini o‘zgartirib,  Tehronni "bo'g'ib qo'yishga" qaratilgan strategiyaga o‘tmoqda.

 

CNN ma’lumotlariga ko‘ra, AQSh bu strategiyadagi o‘zgarish haqida siyosiy ittifoqchilarini ham xabardor qilgan. Tramp muzokaralar guruhiga, jumladan, Jared Kushner, vitse-prezident J. D. Vance va maxsus elchi Stiv Vitkoffga Tehron bilan aloqa qilmaslikni buyurgan.

 

Manbalarga ko‘ra, qarorga Trampning Eron rahbariyati uning talablarini bajarishga tayyor emasligidan noroziligi sabab bo‘lgan. AQSh prezidenti muzokaralarni qayta boshlashdan oldin Tehron o‘zi talab qilayotgan kelishuvga tayyorligini namoyish etishini kutmoqchi.

 

CNN ta’kidlashicha, bu qaror Tramp ilgari Eron bilan muzokaralar yaxshi ketayotgani va yangi kelishuvga erishish imkoniyati mavjudligini bildirgan bayonotlaridan farq qiladi.

 

Tramp esa avvalroq Truth Social tarmog‘ida AQSh Eron bilan muzokara olib bormayotgani va bunday muzokaralarni o‘tkazish rejalashtirilmaganini yozgan edi.