Elektr tarmoqlaridagi yo‘qotishlarni kamaytirish bo‘yicha ilmiy tavsiyalar ishlab chiqildi
Olimlar Jizzaxdagi podstansiyada tadqiqot o‘tkazdi.
Fanlar akademiyasi Energetika muammolari instituti olimlari va tadqiqotchilari Jizzax magistral elektr tarmoqlari filialining 110/10 kV kuchlanishli “Chilonzor” podstansiyasida tadqiqot olib bordi. O‘zbekiston Fanlar akademiyasi prezidenti matbuot kotibi xabar berdi.
Tadqiqot “Energiyani tejash, undan oqilona foydalanish va energiya samaradorligini oshirish to‘g‘risida”gi O‘RQ-940-son qonun talablari asosida tashkil etilgan.
O‘rganish davomida elektr tarmog‘idagi yo‘qotishlar darajasi, transformatorlarning yuklanish rejimi, reaktiv quvvat balansi hamda izolyatsiya resursining eskirish ko‘rsatkichlari chuqur tahlil qilindi.
Tadqiqot natijasida elektr tarmog‘i samaradorligini oshirishga qaratilgan bir qator ilmiy asoslangan tavsiyalar ishlab chiqildi. Xususan, reaktiv quvvatni kompensatsiya qiluvchi qurilmalarni o‘rnatish orqali quvvat koeffitsiyentini me’yoriy darajaga yaqinlashtirish, SCADA tizimi yordamida masofadan boshqarish va elektr tarmog‘ini real vaqt rejimida nazorat qilish imkoniyatlarini joriy etish taklif qilindi.
Shuningdek, yuklama grafigini optimallashtirish maqsadida iste’mol profilini raqamli modellashtirish bo‘yicha tavsiyalar ishlab chiqilgan.
Mutaxassislarning ta’kidlashicha, ushbu ilmiy yechimlarni amaliyotga joriy etish texnik yo‘qotishlarni kamaytirish, elektr ta’minoti ishonchliligini oshirish hamda mamlakat energetika xavfsizligini mustahkamlashga xizmat qilishi mumkin.
