Endi uy-joyni “rassrochka”ga olib bo‘lmaydimi?
Adliya vazirligi tarqalgan xabarlar yuzasidan rasmiy izoh berdi.
Ijtimoiy tarmoqlarda 2027-yildan boshlab uy-joyni “rassrochka”ga olib bo‘lmaydi, degan xabarlar tarqalmoqda. Adliya vazirligi tarqalgan xabarlar yuzasidan izoh berdi.
Prezidentning 2026-yil 14-avgustdagi PQ–294-son qarori bilan 2027-yil 1-yanvardan muddatli to‘lov xizmatlari operatorlari faoliyati tartibga solinadi.
Qarorga ko‘ra, muddatli to‘lov xizmatini ko‘rsatuvchi yuridik shaxslar muddatli to‘lov operatorlari hisoblanadi. Bunday operatorlar orqali ko‘chmas mulk muddatli to‘lov xizmatining obyekti bo‘la olmaydi.
Ya’ni vositachi operator orqali uy-joyni “rassrochka”ga olish imkoniyati bo‘lmaydi.
Ammo bu quruvchi o‘zi barpo etgan uy-joyni xaridorga bevosita bo‘lib-bo‘lib to‘lash sharti bilan sota olmaydi, degani emas.
Qarorda sotuvchi tomonidan iste’molchiga to‘g‘ridan-to‘g‘ri sotish holatlari muddatli to‘lov xizmati tushunchasidan mustasno ekani belgilangan.
Shunday qilib, fuqarolar quruvchining o‘zidan uy-joyni bo‘lib-bo‘lib to‘lash sharti bilan sotib olishlari mumkin. Yangi tartib quruvchi va xaridor o‘rtasidagi bunday bevosita savdoni taqiqlamaydi.
Shuningdek, 2027-yildan muddatli to‘lov operatorlari maxsus reyestrga kiritiladi va Markaziy bank nazorati ostida faoliyat yuritadi. Ularning shartnomalari, ustama va komissiyalariga nisbatan ham aniq talablar belgilanadi.
